शरदचंद्रजी पवारसाहेबांच्या मागणीनूसार केंद्र शासनाने साखर उद्योगासाठी भरीव पॅकेज दयावे. गृहराज्यमंत्री ना.शंभूराज देसाईंची साखर कारखानदारांच्या वतीने मागणी.

सातारा दि.17:- राज्यातील अडचणीत सापडलेल्या सहकारी साखर उद्योगाला अडचणीतून बाहेर काढणेकरीता केंद्र शासनाने सहकारी साखर उद्योगाला मदत करावी,सहकार्य करावे अशा पध्दतीचे मागणी करणारे लेखी पत्र देशाचे माजी कृषी मंत्री,सहकारातील गाढे अभ्यासक आदरणीय शरदचंद्रजी पवारसाहेबांनी देशाचे पंतप्रधान आदरणीय नरेंद्र मोदीसाहेबांना दिले आहे.शरदचंद्रजी पवारसाहेबांच्या या मागणीनुसार केंद्र शासनाने व विशेषत: देशाचे पंतप्रधान आदरणीय नरेंद्र मोदीसाहेबांनी यावर धोरणात्मक निर्णय घेवून अडचणीत सापडलेला सहकारी साखर उद्योग सावरण्याकरीता साखर उद्योगांना केंद्र शासनाकडून भरीव पॅकेज दयावे अशी मागणी राज्य सहकार परिषदेचे माजी अध्यक्ष,राज्याचे गृहराज्यमंत्री ना.शंभूराज देसाईंनी राज्यातील सहकारी साखर कारखानदारांच्या वतीने केली आहे.

देशाचे माजी कृषीमंत्री आदरणीय शरदचंद्रजी पवारसाहेबांनी पंतप्रधान आदरणीय नरेंद्र मोदीसाहेबांना अडचणीत सापडलेल्या सहकारी साखर कारखानदारीला वाचविण्याकरीता दिलेल्या लेखी पत्राच्या अनुषंगाने गृहराज्यमंत्री ना.शंभूराज देसाई हे एका वृत्तवाहिनीशी बोलत होते.त्यावेळी पवारसाहेबांच्या मागणीला दुजोरा देत याची खऱ्या अर्थाने गरज होती कारण गत तीन वर्षापासून महाराष्ट्रातील संपुर्ण साखर कारखानदारी प्रचंड आर्थिक अडचणीमधून जात आहे.जागतिक आणि देशातंर्गत बाजारापेठांमध्ये मोठया प्रमाणात साखरेचे भाव कोसळले आहेत त्यामुळे सर्वच सहकारी साखर कारखाने प्रचंड आर्थिक तफावतीमध्ये आले आहेत. ज्यावेळी केंद्रसरकारने ऊस उत्पादक शेतकऱ्यांना दयावयाचा ऊसाच्या दराचा (एफआरपीचा) भाव निश्चित केला त्यावेळी बाजारामध्ये असणारा साखर विक्रीचा दर आणि प्रत्यक्षात ऊस उत्पादक शेतकऱ्यांना एफआरपी देत असताना साखरेला बाजारात मिळालेल्या दरातील फरक पाहिला तर किमान एका साखरेच्या पोत्याला 700 ते 800 रुपये ही घट याठिकाणी आली आहे. केवळ साखरेचे अनिश्चित भाव, साखरेचे कोसळलेले भाव हेच सहकारी साखर कारखाने आर्थिक अडचणीत सापडण्यामागचे प्रमुख कारण असल्यामुळे आदरणीय शरदचंद्रजी पवारसाहेबांनी पंतप्रधान आदरणीय नरेंद्र मोदीसाहेबांकडे जी लेखी पत्रानुसार विनंती केली आहे ती अतिशय योग्य आणि गरजेची असून आदरणीय पवारसाहेबांच्या विनंतीनुसार केंद्राने यावर धोरणात्मक निर्णय घ्यावा व ही मदत सहकारी साखर उद्योगाला या घडीला देणे अत्यंत गरजेचे आहे.

 दरम्यान कोरोनाचे लॉकडाऊन सुरु होण्यापुर्वी आदरणीय शरदचंद्रजी पवारसाहेब हे सांगली जिल्हयामध्ये एका कार्यक्रमाच्या निमित्ताने आले होते त्यावेळी त्या कार्यक्रमास मी देखील उपस्थित होतो. कार्यक्रम सुरु होण्यापुर्वी मी पवारसाहेबांची भेट घेतली व पवारसाहेबांना याच विषयासंदर्भात मी लेखी पत्र देवून अडचणीत सापडलेल्या साखर उद्योगाची ही सर्व परिस्थिती त्यांचे निदर्शनास आणून देत आर्थिक अडचणीत सापडलेल्या साखर उद्योगाला अडचणीतून बाहेर काढणेसंदर्भात केंद्र शासनानेच एखादे भरीव पॅकेज दयावे  या अनुषगांने त्यांचेबरोबर माझी चर्चा देखील झाली होती. त्यावेळी कोरोनामुळे एवढे दिवस लॉकडाऊन होईल असे कुणालाही वाटले नव्हते.कोरोनाच्या पार्श्वभूमिवर केंद्र सरकार एवढया मोठया घोषणा करीत आहे त्यातलाच एक छोटासा हिस्सा म्हणून केंद्रशासनाने सहकारी साखर उद्योगाला भरीव पॅकेज जाहीर करावे याची भरीव मदत सहकारी साखर उद्योगाला,ऊस उत्पादक शेतकरी,कारखान्यात काम करणारे कामगार,तोडणी मजुर या सगळयांनाचा होईल.त्यामुळे पवारसाहेबांनी देशाचे पंतप्रधान आदरणीय नरेंद्र मोदीसाहेबांकडे केलेल्या मागणीनुसार केंद्र शासनाने सहकारी साखर उद्योगाला भरीव पॅकेज दयावे अशी महाराष्ट्र राज्यातील सर्व शेतकऱ्याच्या वतीने आम्ही सर्व साखर कारखानदार केंद्र शासनाकडे मागणी करीत आहोत.असेही गृहराज्यमंत्री ना.शंभूराज देसाई शेवठी बोलताना म्हणाले.

चौकट:- पवारसाहेब सहकार व जागतिक स्तरावरील साखरेचा अभ्यास असणारे मोठे नेते. - ना.शंभूराज देसाई

देशाचे माजी कृषी मंत्री आदरणीय शरदचंद्रजी पवारसाहेब हे सहकारातील तसेच देशातील आणि जागतिक स्तरावरील साखरेचा गाढा अभ्यास असणारे एक मोठे नेते आहेत त्यांनी अडचणीत सापडलेल्या सहकारी साखर उद्योगासंदर्भात अभ्यासपुर्ण अशी विनंती देशाचे माननीय पंतप्रधानाकडे केली आहे. आदरणीय पवारसाहेबांच्या या मागणीचा केंद्र शासनाने व माननीय पंतप्रधानांनी गांभीर्याने विचार केल्यास अडचणीतील सहकारी साखर कारखानदारी आणि कारखान्यांना ऊस घालणारे शेतकरी या दोघांनाही आर्थिक उभारी येईल असेही गृहराज्यमंत्री ना.शंभूराज देसाई म्हणाले.

कोरोनाच्या संदर्भात वाशिम जिल्हा ग्रीनझोन मध्ये आहे भविष्यातही तसाच राहणेसाठी प्रयत्नशील - पालकमंत्री ना.शंभूराज देसाई बाहेर जिल्ह्यातून आलेल्या मजुरांची काळजी घेण्याचे वाशिम जिल्हयातील अधिकाऱ्यांना आदेश.

सातारा, दि.१५ :- वाशिम जिल्हा ग्रीनझोनमध्ये असून तो तसाच कायम राहील याकरीताचे अतिशय चांगले नियोजन वाशिम जिल्हाप्रशासनाला बरोबर घेवून आम्ही सर्वांनी एकत्रितपणे केले असून वाशिम जिल्हा प्रशासनाच्या नियोजनबध्द कामकाजामुळेच हे सर्व शक्य झाले आहे. वाशिम जिल्हयातील  परराज्यात,परजिल्हयात अडकलेल्या मजुरांना वाशिम जिल्हयात परत आणण्यासाठी मी या जिल्हयाचा पालकमंत्री या नात्याने प्रयत्नशील असून दोन चार दिवसापासून लॉकडाऊनमध्ये शिथिलता आल्यानंतर परजिल्ह्यात, परराज्यात असलेले अनेक मजूर जिल्ह्यात परतले आहेत.या मजुरांची काळजी घ्या,त्यांची आरोग्य तपासणी करून घ्या, विलगीकरण कक्षात त्यांची गैरसोय होणार नाही,याची दक्षता घ्या,असे आदेश पालकमंत्री ना.शंभूराज देसाईंनी आज वाशिम जिल्हयातील सर्व अधिकाऱ्यांना दिले.

कोरोना विषाणू संसर्ग रोखण्यासाठी करण्यात येत असलेल्या व पुढे करावयाच्या विविध उपाययोजनांचा आढावा घेण्यासाठी आज १५ मे रोजी व्हिडीओ कॉन्फरन्सिंगद्वारे ना.शंभूराज देसाई यांचे अध्यक्षतेखाली आढावा बैठक घेण्यात आली.या बैठकीत ते बोलत होते.यावेळी ना.शंभूराज देसाईंनी सातारा जिल्हाधिकारी कार्यालयातून व्हिडीओ कॉन्फरन्सिंगद्वारे मार्गदर्शन केले.तर वाशिमवरुन खासदार भावना गवळी,आमदार राजेंद्र पाटणी,आमदार अमित झनक,जिल्हा परिषद अध्यक्ष चंद्रकांत ठाकरे, जिल्हाधिकारी हृषीकेश मोडक,जिल्हा परिषदेचे मुख्य कार्यकारी अधिकारी दीपक कुमार मीना,पोलीस अधीक्षक वसंत परदेशी, जिल्हा शल्य चिकित्सक डॉ.अंबादास सोनटक्के,जिल्हा आरोग्य अधिकारी डॉ.अविनाश आहेर तर अकोला जिल्हाधिकारी कार्यालयातून आमदार गोपीकिशन बाजोरिया हे या व्हिडीओ कॉन्फरन्सिंगमध्ये सहभागी झाले होते.

यावेळी खासदार भावना गवळी म्हणाल्या,जिल्ह्यातील काही मजूर इतर राज्यात सुद्धा अडकलेले आहेत.त्यांना जिल्ह्यात परत येण्यासाठी प्रयत्न करणे आवश्यक आहे.त्यासाठी संबंधित राज्यांच्या नोडल अधिकाऱ्यांकडे पाठपुरावा करून आपल्या जिल्ह्यातील मजुरांना परत आणण्याची व्यवस्था करावी.तसेच  आमदार राजेंद्र पाटणी म्हणाले,जिल्ह्यातील मोठा मजूर वर्ग इतर जिल्ह्यात व इतर राज्यात आहे.त्यापैकी अनेकजण जिल्ह्यात परतले असले तरी काही मजूर अद्यापही पुणे, मुंबई व सुरत या महानगरांमध्ये अडकलेले आहेत.त्यांना परत आणण्यासाठी प्रयत्न करावेत.तसेच कारंजा उपजिल्हा रुग्णालय येथे रुग्णांसाठी चांगल्या दर्जाच्या आवश्यक सुविधा उपलब्ध करून दिल्या जाव्यात व सगळयांच्या मागणीनुसार सीसीआय मार्फत होत असलेल्या कापूस खरेदीची गती वाढविण्यात यावी. आमदार गोपीकिशन बाजोरिया यांनी कोरोना संसर्ग रोखण्यासाठी करण्यात येत असलेल्या उपाययोजनांसाठी आमदार निधीची रक्कम उपलब्ध करून देवू,असे यावेळी सांगितले.आमदार अमित झनक म्हणले,गतवर्षी अतिवृष्टीमुळे झालेल्या नुकसानीच्या भरपाईची रक्कम अद्याप काही शेतकऱ्यांना मिळालेली नाही.ही रक्कम लवकरात लवकर उपलब्ध करून दिल्यास आगामी खरीप हंगामात शेतकऱ्यांना मदत होईल.जिल्हा परिषद अध्यक्ष ठाकरे म्हणाले, ग्रामीण भागात आरोग्य सुविधा पुरविणाऱ्या वैद्यकीय अधिकारी, कर्मचाऱ्यांना जिल्हा परिषदेमार्फत पीपीई कीट उपलब्ध करून देण्यात येणार आहेत. ग्रामीण रुग्णालय, जिल्हा रुग्णालय येथील वैद्यकीय अधिकारी, कर्मचारी यांना सुद्धा अशा प्रकारे कोरोना विषाणूपासून बचावासाठी आवश्यक साहित्य उपलब्ध करून द्यावे.यावेळी जिल्हाधिकारी हृषीकेश मोडक यांनी कोरोना विषाणू संसर्ग रोखण्यासाठी जिल्ह्यात करण्यात आलेल्या उपाययोजना, कोरोना बाधित रुग्णांची सद्यस्थिती याविषयी माहिती दिली. 

यावेळी पालकमंत्री ना.शंभूराज देसाई म्हणाले, मुंबई, पुणेसह इतर जिल्ह्यातून परतलेल्या मजुरांची संख्या मोठी असून त्यांना गावातील प्राथमिक शाळा अथवा इतर ठिकाणी विलगीकरणात ठेवण्यात येत आहे.ग्रामस्तरीय समितीमार्फत याबाबतचे नियोजन केले जात असून याठिकाणी मजुरांची गैरसोय होणार नाही, याची खबरदारी घ्यावी.तसेच जे मजूर अजूनही जिल्ह्याबाहेर अडकलेले आहेत, अशा मजुरांची जिल्हानिहाय यादी तयार करून सादर करण्याच्या सूचना त्यांनी जिल्हाधिकारी यांना दिल्या. संबंधित जिल्हा प्रशासनाकडे पाठपुरावा करून या मजुरांना जिल्ह्यात आणण्यासाठी आवश्यक कार्यवाही करण्यात येईल, असे सांगत त्यांनी जिल्ह्यात परतलेल्या मजुरांच्या हाताला भविष्यात काम उपलब्ध करून देण्यासाठी नियोजन करावे.त्यांना महात्मा गांधी राष्ट्रीय ग्रामीण रोजगार हमी योजनेंतर्गत जॉब कार्ड बनवून रोजगार देणे शक्य होईल का, याबाबतचा आराखडा सादर करावा, तसेच जिल्ह्यात परतलेल्या प्रत्येक पात्र लाभार्थ्याला तात्काळ धान्य उपलब्ध करून देण्याच्या सूचनाही त्यांनी दिल्या.

जिल्ह्यात सीसीआयमार्फत सुरु असलेली कापूस खरेदी व नाफेडमार्फत करण्यात येत असलेली चना, तूर खरेदी अधिक गतीने होणे आवश्यक आहे. तसेच नोंदणी केलेल्या सर्वच शेतकऱ्यांचा कापूस व तूर खरेदीची कार्यवाही लवकरात लवकर पूर्ण करण्याबाबत काही सुचना या बैठकीत मांडण्यात आल्या आहेत राज्याचे पणनमंत्री आज सातारा जिल्हयात असून त्यांच्याशी मी चर्चा करुन मार्ग काढतो असे सांगितले तर यापूर्वी झालेल्या व्हिडीओ कॉन्फरन्समध्ये होमगार्डच्या मानधनाचा प्रश्न उपस्थित झाला होता. याबाबत मुख्यमंत्र्यांकडे पाठपुरावा केल्यानंतर हा प्रश्न निकाली निघाला असल्याचे त्यांनी सांगितले. तसेच गतवर्षी अतिवृष्टीमुळे झालेल्या नुकसानीच्या भरपाईची रक्कम मिळणेबाबत जिल्हाधिकारी यांनी पाठपुरावा करावा मीही राज्याचे मदत व पुनर्वसन मंत्री यांचेशी संपर्क साधून ही नूकसानभरपाई लवकरात लवकर मिळणेबाबत प्रयत्न करतो असे त्यांनी शेवठी सांगितले.

साहेब, तुमचे उपकार जन्मभर विसरणार नाही, तुमच्यामुळेच माझ्या मारुतीला चांगले उपचार मिळून संजीवन मिळेल.डोंगरपठारावरील कसणी धनगरवाडयाच्या बयाजी यमकरने व्यक्त केली भावना.

पाटण दि. 13  :- रामायणामध्ये बलशाली मारुतीने संजीवनी आणून लक्ष्मण देवाचे प्राण वाचविल्याचे आपण पाहिले आहे, एैकले आहे आणि वाचले आहे.आत्ताच्या युगात पाटण तालुक्यातील कसणी धनगरवाडयाच्या शेतकरी व गरीब कुटुंबातील बयाजी बाबू यमकर यांच्या चौथीत शिकणाऱ्या 10 वर्षाच्या मारुती या मुलासाठी संजीवनी देण्याचे काम राज्याचे गृहराज्यमंत्री ना.शंभूराज देसाईंनी केले आहे.गेल्या एक वर्षापासून लिव्हरच्या त्रासाने त्रस्त असलेल्या मारुतीला मुंबईच्या मोठया रुग्णालयात चांगले उपचार मिळणेकरीता सर्वोत्तोपरी मदत करणारे ना.शंभूराज देसाई  धनगरवाडयाच्या बयाजी यमकर व त्याचा मुलगा मारुती यांच्याकरीता देवदूताप्रमाणे धावून आले असून ना.शंभूराज देसाईंनी केलेली मदत पाहून “साहेब,तुमचे उपकार मी जन्मभर विसरणार नाही,तुमच्यामुळेच माझ्या मुलाला आता चांगले उपचार मिळून त्याला संजीवन मिळेल” अशी भावना  कसणीच्या धनगरवाडयाच्या बयाजी यमकर या गरीब कुटुंबातील शेतकऱ्याने व्यक्त केली आहे.

                     पाटणच्या नकाशावरचे एका टोकाचे डोंगरपठारावर वसलेले कसणी गांव या गांवातंर्गत असणारा धनगरवाडा येथील बयाजी बाबू यमकर यांचा चौथीत शिकणारा 10 वर्षाचा मुलगा मारुती गेल्या एक वर्षापासून लिव्हरच्या त्रासाने त्रस्त आहे.त्याचे लिव्हर खराब झाल्याने पोटात पाणी साचून राहत आहे त्यामुळे शरीरापेक्षा पोटाचा भागच मोठा दिसत असल्याने त्याच्यावर उपचार करण्याकरीता वर्षभरापासून मारुतीचे गरीब वडील कधी कराड, कधी कोल्हापुर, कधी सांगली येथील वेगवेगळया दवाखान्यात मारुतीला घेवून जात आहेत. त्याच्या या आजारावर शस्त्रक्रिया करायची तर पाच लाखांचा खर्च येईल असे अनेक डॉक्टरांनी सांगितल्यामुळे एवढा मोठा खर्च आपल्याला परवडणारा नाही तसेच वैद्यकीय मदत मिळून मिळून किती मिळणार या चिंतेत असणाऱ्या बयाजी यमकरांनी मागील आठवडयात राज्याचे गृहराज्यमंत्री ना.शंभूराज देसाईंची भेट घेतली.

                   साहेब, हा माझा मुलगा मारुती त्याचे पोट बघा, डॉक्टरांनी त्याचे लिव्हर खराब झाले असल्याचे सांगितले आहे. मी गरीब आहे त्याचेवर उपचार करण्याची माझी परिस्थिती नाही तुम्हीच काहीतरी करा.माझे मुलाला चांगल्या दवाखान्यात चांगले उपचार मिळवून दया आणि त्याला यातून वाचवा अशी कैफियत मांडली. क्षणाचाही विलंब न करता ना.शंभूराज देसाईंनी राज्याचे सार्वजनीक बांधकाम मंत्री ना.एकनाथ शिंदे यांना व त्यांचेकडे वैद्यकीय सेवा देणाऱ्या संस्थेतील पदाधिकाऱ्यास फोन लावला आणि बयाजी यमकरने मांडलेली त्याच्या मुलाच्या आजारपणाची कैफियत सांगितली. सार्वजनीक बांधकाम मंत्री ना.एकनाथ शिंदे यांनी व त्यांच्या संस्थेतल्या पदाधिकाऱ्यांनी त्या मुलाला तात्काळ उपचाराकरीता मुंबईला पाठवून दया असे ना.देसाईंना सांगितले.

                  लॉकडाऊनच काळ असल्यामुळे हा गरीब बयाजी आपल्या मुलाला घेवून मुंबईला जाणार कसा? असा प्रश्न पडलेल्या ना.शंभूराज देसाईंनी लगेच पाटणच्या प्रांताधिकारी यांना फोन लावला आणि कसणीच्या धनगरवाडयाच्या बयाजी यमकरच्या मुलाला तात्काळ उपचाराकरीता मुंबईला पाठवयाचे आहे त्याच्या प्रवासाची परवानगी देणेकरीता तुम्ही स्वत: ऑनलाईन अर्ज भरा आणि जिल्हाधिकाऱ्यांकडे सादर करा मी जिल्हाधिकाऱ्यांशी बोलतो. बयाजीला प्रांताधिकारी यांची भेट घ्यायला सांगून आवश्यक ती कागदपत्रे त्यांना दाखव तुमच्या प्रवासाचा पास मिळेल, पास मिळाला की मला सांग मी आरोग्य विभागाची 108 ची ॲम्ब्युलन्स तुला तुझ्या मुलाला मुंबईच्या रुग्णालयापर्यंत पोहचविण्याकरीता देण्याची व्यवस्था करतो. असे सांगितले. दुसऱ्या दिवशी प्रवासाचा पास मिळताच ना.शंभूराज देसाईंनी बयाजी यमकर आणि त्याच्या मुलाला 108 ॲम्ब्युलन्स उपलब्ध करुन देत या ॲम्ब्युलन्समधून रुग्णालयाकडे रवाना केले आणि ना.एकनाथ शिंदे यांच्या संस्थेत व रुग्णालयात फोन करुन सांगितले पेशंन्ट पाठविला आहे त्याच्या वडीलाची परिस्थिती नाही त्या मुलावर मोफत उपचार करा.बयाजी यमकर आणि त्याचा 10 वर्षाचा मारुती मुंबईच्या रुग्णालयात सुखरुप पोहचले असून मारुतीवर उपचार करण्याचे काम रुग्णालयात सुरु झाले आहे. उपचारासाठी सर्वोत्तोपरी मदत करणाऱ्या गृहराज्यमंत्री ना.शंभूराज देसाईंना बयाजीने फोन करुन सांगितले साहेब, माझे मारुतीवर उपचार सुरु झाले आहेत मी व माझे कुटुंब तुमचे उपकार जन्मभर विसरणार नाही.

धक्काबुक्की झालेल्या “त्या ” पोलिस अधिकाऱ्याला गृहराज्यमंत्र्यांचा फोन. डगमगू नको, राज्याचा गृहराज्यमंत्री तुझ्या पाठीशी आहे.

पाटण दि.13 :- म्हसवड जि.सातारा येथील पोलिस स्टेशनच्या पोलिस अधिकाऱ्याच्या अंगावर धावून जावून धक्काबुक्की केल्याची घटना राज्याचे गृहराज्यमंत्री ना.शंभूराज देसाईंच्या कानावर गेली. ही घटना कानावर जाताच त्यांनी तात्काळ जिल्हा पोलिस अधीक्षकांना फोन करुन संबधित पोलिस अधिकाऱ्यांला धक्काबुक्की करणाऱ्या आरोपीवर तातडीने गुन्हा दाखल करुन त्याच्यावर कडक कायदेशीर कारवाई करा असे सक्त आदेश दिले.पोलिस अधीक्षकांचा फोन ठेवताच गृहराज्यमंत्री ना.शंभूराज देसाईंनी धक्काबुक्की झालेल्या अमोल कदम या  पोलिस  अधिकाऱ्याला फोन लावला आणि अमोल,डगमगू नकोस, राज्याचा गृहराज्यमंत्री तुझ्या पाठीशी आहे,घडलेली घटना माझे कानावर आली आहे.मी वरीष्ठांशी बोललो आहे. कर्तव्य बजावित असताना कुणीही असो वर्दीवर हात टाकलेला सहन केला जाणार नाही असा दिलासा त्यांनी “त्या” पोलिस अधिकाऱ्याला दिला आणि काळजी घे असेही त्यांनी “त्या” पोलिस अधिकाऱ्याला सांगितले.

              सातारा जिल्हयातील म्हसवड येथे कोरोनाचा संसर्ग रोखण्याकरीता लॉकडाऊनच्या काळात बंदोबस्ताच्या ठिकाणी आपले कर्तव्य बजावित असताना म्हसवड पोलिस स्टेशनचे पोलिस उपनिरीक्षक अमोल कदम या पोलिस अधिकाऱ्यास अर्वाच्च भाषेत बोलत दमदाटी करुन त्या पोलिस अधिकाऱ्याच्या अंगावर म्हसवड येथील एक पदाधिकारी धावून गेला व त्या आरोपी पदाधिकाऱ्याने शासकीय कामात अडथळा निर्माण करुन अमोल कदम या पोलिस उपनिरीक्षकांस धक्काबुक्कीही केली असल्याची घटना दोन दिवसापुर्वी म्हसवड येथे घडली. घडलेली ही घटना राज्याचे गृहराज्यमंत्री ना.शंभूराज देसाईंच्या कानावर गेली असता त्यांनी या घटनेची गंभीर दखल घेत तात्काळ जिल्हा पोलिस अधिक्षकांना फोन केला आणि शासकीय कामात अडथळा निर्माण करीत पोलिस उपनिरीक्षकाच्या अंगावर धावून गेलेल्या त्या आरोपीवर तातडीने गुन्हा दाखल करा आणि कडक कायदेशीर कारवाई करा.कोणीही किती मोठा असला तरी शासकीय कामात अडथळा निर्माण करणाऱ्या आणि कर्तव्य बजावित असताना वर्दीवर हात टाकणाऱ्यांची गय केली जाणार नाही.पोलिसांनी तर अशांची अजिबात गय करु नये तात्काळ दिलेल्या आदेशाची अंमलबजावणी करा असे ना.शंभूराज देसाईंनी सांगितलेनंतर पोलिस उपनिरीक्षकाला धक्का बुक्की करणाऱ्या त्या आरोपीवर तात्काळ गुन्हा दाखल करण्यात आला असून त्याच्यावर पुढील कडक कायदेशीर कारवाई करण्याचे काम पोलिस यंत्रणेकडून सुरु आहे.

           राज्याच्या गृहराज्यमंत्री या नात्याने आपल्या विभागाच्या एका अधिकाऱ्याला शिवीगाळ होते,त्या अधिकाऱ्याच्या अंगावर जावून त्यास धक्काबुक्की होते हा प्रकार चुकीचा असून अशांना धडा शिकविण्याचे काम गृहराज्यमंत्री ना.शंभूराज देसाईंनी केलेच आहे त्याचबरोबर ज्या पोलिस अधिकाऱ्याला धक्काबुक्की झाली त्या पोलीस अधिकाऱ्याला आपण राज्याचा गृहराज्यमंत्री आहे हा अविर्भाव न बाळगता त्यांनी स्वत: त्यास फोन केला आणि आपलुकीने “त्या” अधिकाऱ्याची चौकशी करीत डगमगू नकोस, राज्याचा गृहराज्यमंत्री तुझ्या पाठीशी ठाम उभा आहे असा दिलासा देत माणूसकीही जपण्याचे काम गृहराज्यमंत्री ना.शंभूराज देसाईंनी केले.

पालकमंत्र्यांच्या कालच्या बैठकीत झालेल्या निर्णयानुसार उपाययोजना करा. गृहराज्यमंत्री ना.शंभूराज देसाईंच्या पाटण तालुक्यातील शासकीय अधिकाऱ्यांना सुचना. लॉकडाऊन शिथील झाले तरी नियमांचे पालन करुन खबरदारी घेण्याचे जनतेला केले आवाहन.

          पाटण दि.१२:- कोरोनाच्या प्रतिबंधासाठी काल जिल्हयाच्या ठिकाणी पालकमंत्री,जिल्हयातील सर्व आमदार,खासदार यांची बैठक पार पडली या बैठकीत विविध विषयांवर चर्चा करुन जिल्हयामध्ये कोरोनावर कशाप्रकारे प्रतिबंध आणता येईल याबाबत काही निर्णय घेण्यात आले. आपल्या तालुक्यात सुमारे ६५ हजार नागरिक पुर्वीच आपल्या मुळगांवी आलेले आहेत तर अजुनही १७ ते साडेसतरा हजार लोक मुंबई, पुणे तसेच राज्यातील इतर शहरातून येणे अपेक्षित आहेत. कोरोनाचा संसर्ग वाढू नये याकरीता काल झालेल्या बैठकीत जे
निर्णय घेण्यात आले आहेत त्या निर्णयानुसार तालुकास्तरावर सर्व उपाययोजना राबविण्यात याव्यात अशा सक्त सुचना गृहराज्यमंत्री ना.शंभूराज देसाईंनी आज पाटण तालुक्यातील सर्व शासकीय अधिकाऱ्यांना दिल्या.तसेच ज्याठिकाणी कोरोनाचे रुग्ण नाहीत अशा ठिकाणी दि.१७ मे नंतर कदाचित लॉकडाऊनमध्ये शिथिलता आल्यानंतर बाहेरगांवाहून पाटण तालुक्यात येणाऱ्या प्रत्येक नागरिकांने शासकीय नियमांचे पालन करुन खबरदारी घ्यावी असे आवाहनही त्यांनी केले
             गृहराज्यमंत्री ना.शंभूराज देसाईंच्या अध्यक्षतेखाली पाटण तहसिल कार्यालय येथे पाटण तालुक्यातील सर्व शासकीय अधिकाऱ्यांची बैठक आयोजीत करण्यात आली होती.या बैठकीमध्ये लॉकडाऊनमध्ये शिथिलता आल्या नंतर तालुक्यात काय काय उपाययोजना राबवावयाच्या यासंदर्भात सविस्तर चर्चा करण्यात आली.यावेळी गृहराज्यमंत्री ना.शंभूराज देसाईंनी विविध विषयांवर बैठकीत अधिकाऱ्यांना सुचना केल्या.यावेळी बैठकीस पाटणचे प्रातांधिकारी श्रीरंग तांबे,पाटणचे उपविभागीय पोलीस अधिकारी अशोक थोरात,तहसिलदार समीर
यादव,गटविकास अधिकारी मीना साळुंखे, पाटण ग्रामीण रुग्णालयाचे अधीक्षक डॉ.चंद्रकांत यादव,तालुका वैद्यकीय अधिकारी डॉ.आर.बी. पाटील, पाटणच्या सपोनि तृप्ती सोनावणे,पाटण नगरपंचायतीचे मुख्य कार्यकारी अधिकारी अभिषेक परदेशी,पाटण आगाराचे आगारप्रमुख उथळे,शिवसेना जिल्हाप्रमुख जयवंतराव शेलार,माजी जि.प.सदस्य बशीर खोंदू, माजी प.स.सदस्य बबनराव भिसे यांची उपस्थिती होती.
           यावेळी बोलताना गृहराज्यमंत्री ना.शंभूराज देसाई म्हणाले, शासकीय माहितीनुसार पाटण तालुक्यात यापुर्वीच ६५ हजार नागरिक आले आहेत व अजुन सतरा ते साडेसतरा नागरिकांनी येण्याकरीता मागणी केली आहे. दि.१७ मे नंतर कदाचित लॉकडाऊनमध्ये शिथिलता आल्यानंतर मुंबई,पुणे तसेच राज्यातील इतर शहरातील नागरिक हे आपल्या मुळ गांवी परततील परंतू कोरोनाचा संसर्ग वाढू नये याकरीता प्रशासन म्हणून आपण खबरदारी घेवून काळजी घेणे आवश्यक तर आहेच परंतू बाहेरगांवाहून येणाऱ्या प्रत्येक नागरिकांनेही स्वत:ची तसेच त्याच्या कुटुंबांची काळजी घेणेकरीता त्याची त्यानेच खबरदारी घेणे गरजेचे आहे.बाहेरगांवाहून येणाऱ्या प्रत्येक नागरिकांने होम कॉरन्टाईन होणेकरीता सरकारी कर्मचाऱ्यांमार्फत अधिकृत सुचना देण्याची अंमलबजावणी प्रशासनाने करावी याकरीता मंडलाधिकारी,पंचायत समितीचे विस्तार अधिकारी यांना
तालुक्यातील विभाग वाटून देवून त्यांचे देखरेखी खाली गावांगांवातील तलाठी,ग्रामसेवक,पोलीस पाटील ही यंत्रणा कार्यरत ठेवावी. बाहेरगांवाहून आलेला प्रत्येक नागरिक हा या कालावधीत होम कॉरन्टाईन झाला आहे का? याची तपासणी या यंत्रणेमार्फत करुन घ्यावी. यावर प्रांताधिकारी, उपविभागीय पोलीस अधिकारी यांनी नियंत्रण ठेवावे.
          मुंबई तसेच पुणे येथील कन्टेटमेंन्ट झोनमधील नागरिकांना मुळगांवी जाण्याची परवानगी देणेबाबत अजुनही काही निर्णय झाला नाही. असे असले तरी आपण प्रशासनाने सर्वच बाजूने काळजी आणि खबरदारी घेणे आवश्यक आहे. बाहेरगांवाहून आलेल्या नागरिकांना होम कॉरन्टाईनचा शिक्का मारल्यानंतर तो व्यक्ती बाहेर कुठे फिरत नाही ना? हेही तपासण्याचे काम वरील सर्व यंत्रणांना लावावे तसेच पोलीस यंत्रणेने ज्या ज्या ठिकाणी चेकनाके तयार केले आहेत त्या त्या चेकनाक्यावरुन बाहेरगांवाहून किती व्यक्ती कोणत्या गांवात आले याचीही माहिती संबधित गावकऱ्यांना देण्यात यावी व संबधित गांवातील त्या व्यक्तींना होम कॉरन्टाईन करताना तेथील ग्रामसमितीलाही विश्वासात घ्यावे. पोलीस यंत्रणेनेही फिरते पथक कार्यान्वीत करुन विभागाविभागात याची तपासणी करुन घ्यावी. आतापर्यंत प्रशासनाने योग्यप्रकारे कोरोनाचा प्रतिबंध करण्याकरीता नियोजन केले आहे त्याचपध्दतीने यापुढेही करावे असे गृहराज्यमंत्री ना.शंभूराज देसाईंनी बैठकीत सांगितले.
चौकट: बाहेरगांवाहून येणाऱ्या प्रत्येकाने शासकीय नियमांचे पालन करा- ना.शंभूराज देसाई.
          कोरोनाचे संकट मोठे आहे,काही दिवसानंतर लॉकडाऊनमध्ये शिथीलता आली तरी बाहेरगांवाहून येणाऱ्या प्रत्येक नागरिकाने आपल्या स्वत:च्या, कुटुंबांच्या तसेच गावकऱ्यांच्या आरोग्याच्या दृष्टीने शासकीय नियमांचे
पालन करुन होम कॉरन्टाईन व्हावे. जेणेकरुन कोरोनाचा प्रसार होणार नाही याची काळजी घेण्याची जबाबदारी बाहेरगांवाहून येणाऱ्या प्रत्येकाची असून ती काळजी प्रत्येकांनी घ्यावी असे आवाहन ना.शंभूराज देसाईंनी या बैठकीत केले.

*लाॅकडाऊनच्या काळात भरऊनात कर्तव्य बजाविणाऱ्या सातारा जिल्ह्यातील पोलीस यंत्रणेला गृहराज्यमंत्री ना.शंभूराज देसाईंनी लस्सीचे वाटप करुन दिला थंडावा*

सातारा दि.१०:- कोरोनाचा संसर्ग वाढू नये याकरीता लाॅकडाऊनच्या काळात बंदोबस्ताकरीता रस्त्यावर भरऊनात उभे राहून आपले कर्तव्य बजाविणाऱ्या सातारा जिल्ह्यातील पोलीस यंत्रणेतील वरिष्ठ पोलीस अधिकाऱ्यासह कनिष्ठ पोलीस कर्मचारी यांना राज्याचे गृहराज्यमंत्री ना.शंभूराज देसाईंनी थंडावा दिला आहे. भरऊनात प्रत्यक्षात बंदोबस्तात कार्यरत असणाऱ्या सातारा जिल्ह्यातील सर्व पोलिस अधिकारी व कर्मचारी यांना आज गृहराज्यमंत्री ना.शंभूराज देसाईंच्या वतीने लस्सीचे वाटप करण्यात आले. गृहराज्यमंत्री ना.शंभूराज देसाईंनी प्रातिनिधीक स्वरुपात सातारा येथे पोलिस अधिकारी व कर्मचाऱ्यांना लस्सीचे वाटप केले तर जिल्ह्यातील प्रत्येक तालुक्यामध्ये उपविभागीय पोलिस अधिकारी यांचेमार्फत लस्सीचे वाटप करण्यात आले.
       राज्याचे गृहराज्यमंत्री ना.शंभूराज देसाईंकडून नेहमीच सामाजीक क्षेत्रात विविध उपक्रम राबविण्यात येतात. कोरोनाचे संकट वाढत असताना कोरोनाचा संसर्ग वाढू नये याकरीता आपला जीव धोक्यात घालून दिवसरात्र बंदोबस्तात कार्यरत असणाऱ्या पोलीस अधिकारी व कर्मचारी यांचे मनोबल वाढविण्याकरीता त्यांच्या आरोग्याची विचारपुस करण्याकरीता ना.शंभूराज देसाईंनी त्यांच्या संरक्षणाकरीता असणारा सर्व लवाजमा बाजूला ठेवून स्वत: दुचाकीवरून सातारा शहरात फेरफटका मारुन पोलिस अधिकारी व कर्मचारी यांचे आरोग्याची तसेच बंदोबस्तामध्ये कसली अडचण नाही ना ? याची विचारपुस करुन पोलिस यंत्रणेचे मनोबल वाढविले होते. 
       आज त्यांनी संपुर्ण सातारा जिल्ह्यातील प्रत्येक तालुक्यात कोरोनाच्या संकटसमयी लाॅकडाऊनच्या बंदोबस्तात कार्यरत असणाऱ्या आणि भरऊनात आपली ड्यूटी करून कर्तव्य बजाविणाऱ्या सर्व पोलिस अधिकारी व कर्मचारी यांना भरऊनात थंडावा मिळावा याकरीता पोलिस यंत्रणेतील सर्वांना लस्सी वाटपाचा आगळावेगळा उपक्रम राबविला. प्रातिनिधीक स्वरुपात ना.शंभूराज देसाईंनी सातारा येथील बाॅम्बे रेस्टाॅरन्ट चौकात पोलिस अधिकारी व कर्मचाऱ्यांना लस्सीचे वाटप केले तर जिल्ह्यातील सातारा,कराड,पाटण,वाई, माण-खटाव,कोरेगांव,फलटण या तालुक्यामध्ये उपविभागीय पोलिस अधिकारी यांचेमार्फत सर्वांना लस्सीचे वाटप करण्यात आले. गृहराज्यमंत्री ना.शंभूराज देसाई यांचेमार्फत सातारा जिल्ह्यातील सर्व तालुक्यातील सुमारे १८७५ पोलिस अधिकारी व कर्मचारी यांना लस्सीचे वाटप करण्यात आले. गृहराज्यमंत्री ना.शंभूराज देसाईंच्या या उपक्रमांबद्दल सातारा जिल्ह्यातील सर्व पोलिस अधिकारी व पोलिस कर्मचारी यांनी ना. शंभूराज देसाईंचे आभार व्यक्त करुन पोलिसांची काळजी घेणारा गृहराज्यमंत्री ना .शंभूराज देसाईंच्या रुपाने महाराष्ट्र राज्याला मिळाला असल्याची प्रतिक्रिया पोलिस अधिकारी, कर्मचारी यांनी व्यक्त केल्या.

जीवनावश्यक साहित्य खरेदी करायला सुट दिली तरी जनतेने सोशल डिस्टटींग पाळा. ना.शंभूराज देसाईंचे पाटण मतदारसंघातील जनतेला आवाहन. सोशल डिस्टटींगचे नियम पाळले जातात का ? याकरीता बाजारपेठांची ना.देसाईंनी केली प्रत्यक्ष पहाणी.

           दौलतनगर दि.०५  :- लॉकडाऊनचा कालावधी वाढल्यामुळे ग्रामीण भागातील जनतेला जीवनावश्यक साहित्य मिळत नसल्याने जनतेची मोठी अडचण होत असल्यामुळे ज्याठिकाणी कोरोनाचे रुग्ण नाहीत अशा पाटण तालुक्यात जीवनावश्यक साहित्य खरेदी करायला सकाळी ०९ ते दुपारी ०२ पर्यंत अत्यावश्यक सेवेतील किराणा मालाची,औषधांची दुकाने उघडण्यास सुट देण्याचे आदेश जिल्हाधिकारी,सातारा यांनी काढले आहेत.जीवनावश्यक साहित्य खरेदी करायला दुकाने उघडण्याची सुट दिली तरी साहित्य खरेदी करणाऱ्या जनतेने सोशल डिस्टटींग पाळावे व प्रशासनाला सहकार्य करावे असे आवाहन गृहराज्यमंत्री ना.शंभूराज देसाईंनी आज पाटण विधानसभा मतदारसंघातील जनतेला केले त्याचबरोबर त्यांनी मल्हारपेठ,नवारस्ता व पाटण येथील बाजारपेठेमध्ये प्रत्यक्ष जावून सोशल डिस्टटींगचे नियम पाळले जातात का ? याचीही अधिकाऱ्यांसमवेत पहाणी करीत जीवनावश्यक साहित्य खरेदी करणाऱ्यांची त्यांनी आपुलकीने विचारपुस करुन चौकशीही केली.

           कालच जिल्हाधिकारी,सातारा यांनी पाटण तालुक्यातील मल्हारपेठ,नवारस्ता,पाटण नगरपंचायत, तळमावले, ढेबेवाडी व तारळे येथील बाजारपेठामध्ये पाटण तालुक्यातील डोंगरी भागातील जनतेला लॉकडाऊनच्या काळात जीवनावश्यक साहित्य मिळत नसल्याने या सहा बाजारपेठांमध्ये जीवनावश्यक साहित्य खरेदी करायला सकाळी ०९ ते दुपारी ०२ पर्यंत अत्यावश्यक सेवेतील किराणा मालाची,औषधांची दुकाने उघडण्यास सुट देण्याचे आदेश दिले आहेत या आदेशाची अंमलबजावणी लॉकडाऊनचे सर्व नियम पाळून संबधित अत्यावश्यक सेवेतील दुकानदार, केमिस्ट दुकाने यांच्याकडून होत आहे का? बाजारपेठांमध्ये जनतेकडून सोशल डिस्टटींगचे नियम पाळले जात आहेत का ? याची प्रत्यक्ष पहाणी करण्याकरीता ते मल्हारपेठ, नवारस्ता व पाटण येथील बाजारपेठेमध्ये आले होते त्यानंतर त्यांनी पाटण तहसिल कार्यालय येथे तालुका प्रशासनातील सर्व अधिकाऱ्यांची बैठक घेतली यावेळी त्यांनी वरीलप्रमाणे जनतेला सोशल डिस्टटींगचे आणि प्रशासनाला सहकार्य करण्याचे आवाहन केले.

          यावेळी ना.शंभूराज देसाईंनी लॉकडाऊनच्या काळात जनतेला येणाऱ्या अडीअडचणींची माहिती तालुका प्रशासनातील अधिकाऱ्यांना देत जनतेला लॉकडाऊनच्या काळात अनेक अडचणींचा सामना करावा लागत आहे. यावर उपाययोजना म्हणून कालच जिल्हाधिकारी,सातारा यांना सुचना करुन किमान डोंगरी भागातील जनतेला दोनवेळचे अन्न सुरळीत मिळण्याकरीता जीवनावश्यक साहित्य खरेदी करण्याकरीता सकाळी ०९ ते दुपारी ०२ पर्यंत अत्यावश्यक सेवेतील किराणा मालाची,औषधांची दुकाने उघडण्यास आपण आदेशित केले त्यानुसार जीवनावश्यक साहित्यांची दुकाने उघडली गेली परंतू याठिकाणी सोशल डिस्टटींग राहते का? जनतेला सुरुळीत जीवनावश्यक साहित्य मिळते का? हे पहाणे प्रशासनाचे काम आहे.त्यामुळे अशा बाजारपेठांमध्ये तालुका प्रशासनातील अधिकाऱ्यांनी योग्य ती खबरदारी घ्यावी त्याकरीता मंडलाधिकारी, तलाठी, ग्रामसेवक, पोलीस पाटील यांच्यामार्फत दुकानदारांना सुचित करण्यात यावे.ज्या दुकानदारांकडून सोशल डिस्टटींगचे पालन केले जात नाही अशा दुकानदारांवर कारवाई करावी अशा सक्त सुचना त्यांनी यावेळी पोलीस व महसूल विभागाच्या अधिकाऱ्यांना केल्या.

          आपल्या तालुक्यात कोरोनाचा एकही रुग्ण नाही ही आनंदाची बाब आहे.कोरोनाचा संसर्ग आपल्या तालुक्यात होवू नये याकरीता आतापर्यंत जी काळजी आपण घेतली आहे तीच काळजी पुढील काळातही आपण सर्वांनी घ्यायची आहे असे सांगून शेतकऱ्यांना शेतामध्ये टाकण्याकरीता खते मिळत नाहीत बिबियाणे मिळत नाही तसेच बँकामध्ये जमा झालेले अनुदान बँका बंद असल्यामुळे मिळत नाही अशा अनेक तक्रारी आल्या आहेत यासंदर्भात जिल्हाधिकारी,सातारा यांना सुचना करुन शेतकऱ्यांना वेळेवर खते,बि बीयाणे देणेकरीता त्याचबरोबर बँकामधील अनुदानाची रक्कम शेतकऱ्यांना मिळणेकरीताच्या उपाययोजना करण्याचे सुचित केले जाईल असे सांगून तीनचार दिवसापुर्वी झालेल्या वादळी पाऊसामुळे तालुक्यातील अनेक विभागात घरांचे, शेडांचे पत्रे उडून गेले आहेत याची दुरुस्ती करणेकरीता आवश्यक असणारे पत्रे, खिळेमुळे देणेकरीता हार्डवेअरची दुकानेही सुरु करण्यासंदर्भात सुचित केले जाईल याचेही नियोजन तालुका प्रशासनाने करावे असे त्यांनी यावेळी अधिकाऱ्यांना सुचित केले.यावेळी ना.शंभूराज देसाईं यांचेसोबत पाटणचे प्रातांधिकारी श्रीरंग तांबे,पाटणचे उपविभागीय पोलीस अधिकारी अशोक थोरात,तहसिलदार समीर यादव, गटविकास अधिकारी मीना साळुंखे,पाटण ग्रामीण रुग्णालयाचे अधीक्षक डॉ.चंद्रकांत यादव,तालुका वैद्यकीय अधिकारी डॉ.आर.बी.पाटील,पाटणच्या सहा.पोलिस निरिक्षक तृप्ती सोनावणे,पाटण नगरपंचायतीचे मुख्य कार्यकारी अधिकारी अभिषेक परदेशी,नायब तहसिलदार प्रशांत थोरात यांची उपस्थिती होती.