तुम्ही तर अर्ध्या हळकुंडाने पिवळे होणारे..!गृहराज्यमंत्री ना.शंभूराज देसाई. नाटोशी येथील विविध विकास कामांचा भूमिपूजन कार्यक्रम संपन्न.

 

दौलतनगर दि.28(जनसंपर्क कक्ष,राज्यमंत्री कार्यालय):-केवळ १०२ मतदारांची निवडणूक जिंकून विधानसभा जिंकल्याचा आव आणून अर्ध्या हळकुंडाने पिवळे होणं बरं नव्ह...अहो तुम्ही तर 'शाश्वती' नसणाऱ्या पिक्चरच्या ट्रेलरची भाषा करता.मात्र आम्ही तसला न चालणारा पिक्चर न दाखवणार नाही  तर तुम्हाला शोले सारखा 'सुपरहिट" पिक्चरच दाखवावाच लागेल असा टोला मंत्री शंभुराज देसाई यांनी सत्यजितसिंह पाटणकर यांना लगावला .दरम्यान २०२४ च्या सुपरहिट पिक्चरच्या तयारी साठी कार्यकर्त्यांनी आत्तापासूनच कामाला लागावे,असे आवाहन ही मंत्री ना. शंभूराज देसाई यांनी केले.

               नाटोशी,ता. पाटण येथे सन 2020-21 च्या अर्थसंकल्पातून मंजूर झालेल्या नवजा हेळवाक मोरगिरी गारवडे साजूर विंग वाठार रस्ता आणि नाटोशी ते कुसरूंड रस्त्याची सुधारणा व टकलेवाडी मातंगवस्ती रस्ता कॉक्रटीकरण या कामांच्या भूमीपूजन कार्यक्रमप्रसंगी ते बोलत होते. यावेळी सातारा जिल्हा शिवसेना जिल्हाप्रमुख जयवंतराव शेलार, जिल्हा परिषद सदस्या सौ. सुग्रा खोंदू, बशीर खोंदू, बबनराव भिसे,गणेश भिसे,भागोजीशेठ शेळके,नथुराम कुंभार, सरपंच अविनाश कुंभार,उपसरपंच उदय  देसाई, विष्णुपंत देसाई, रामभाऊ देसाई,विष्णू मोरे,संपतशेठ कोळेकर,विजय शिंदे,विजय देशमुख,आनंदा मोहिते,सुनील खामकर,मोहन पाटील,मधुकर शिंदे,चेतन देसाई यांचेसह यांची उपस्थिती होती.

            यावेळी ना.शंभूराज देसाई म्हणाले, महाराष्ट्राला मुख्यमंत्री उद्धवजी ठाकरे यांच्या रूपाने संयमी,दूरदृष्टी चे नेतृत्व लाभले आहे.म्हणूनच राज्यात विकासाचे नवे पर्व सुरू झाले मात्र कोविड काळात  एक लाख कोटी रुपयाने राज्याचे आर्थिक उत्पन्न घटून ही  राज्यातील सर्वसामान्य जनतेच्या कामासाठी मुख्यमंत्री ठाकरे यांच्या मार्गदर्शनाखाली राज्यातील महाविकास आघाडी सरकारने आर्थिक निधी कधीही कमी पडू दिला नाही.पाटण मतदारसंघात परिवर्तन कशाला म्हणतात हेच अजून कळले नाही हे तालुक्याचे दुर्दैव आहे. सातारा जिल्हा बँकेच्या निवडणुकीत तालुक्यातील सोसायटींच्या एकूण १०२ मतांपैकी 58 मतदान मिळाले म्हणजे परिवर्तन झाले असा डोंगरा पिटनारे  विरोधक  आताच अर्ध्या हळकुंडाने पिवळे झाले आहेत.मतदार संघातील केवळ १०२ नव्हे तर तमाम जनतेने एकदा १५ हजार आणि दुसऱ्यांदा तब्बल १८ हजार मतांनी पराभव करून यांना अस्मान दाखवले हे विसरून सत्तेच्या माजाची आणि मस्तीची  भाषा करीत आहेत. आम्ही कधीही सत्तेचा गैरवापर केला नाही आणि करायचाच असता तर निवडणूक काळांत तुम्ही तुमच्या मतदारांना कुठं पाठवले होते ,कुठल्या हॉटेलात राहत होता,कुठं कुठं फिरत होता हे काय आपणाला माहीत नव्हते काय?मला मतदारच मिळवायचे  असते तर मला काहीही अवघड गोष्ट नव्हती तिथं जाऊन सुद्धा मला ते मिळवता आले असते मात्र  आम्ही  कधीही सत्तेची  मस्ती  आणि गुर्मी दाखवली नाही आणि दाखवायचीच असती तर तुमची संपूर्ण कुंडली ही आम्ही मांडली असती.असे स्पष्ट करून मंत्री देसाई म्हणाले,21 वर्षे सत्ता असताना ही या  मोरणा,कोयना ,मल्हारपेठ भागावर सापत्न भावनेतून पाहिले आणि विकासकामांत जाणीवपूर्वक दुर्लक्ष केले मात्र विकास कामांत कधीही राजकारण आणू नये  उलट ज्यांना  लोकांनी निवडून देऊन आमदार केले आहे त्यांनी कोणताही राजकीय भेदभाव  न करता संपूर्ण तालुक्याचा सर्वांगीण विकास करणे ही त्या लोकप्रतिनिधींची  नैतिक जबाबदारी आहे अशी शिकवण आम्हाला लोकनेते बाळासाहेब देसाई  यांनी घालून दिली आहे.म्हणूनच २००४ नंतर आपण आमदार झाल्यानंतर पाटण मतदार संघात विकासकामांच्या कधीही असमतोल दिसला नाही आणि यापुढे दिसणार ही नाही,असे शेवटी त्यांनी सांगीतले.कार्यक्रमाचे प्रास्तावित बशीर खोंदू यांनी केले तर आभार ॲङमारुती देसाई मानले.यावेळी मोरणा विभागातील विविध गावचे सरपंच,उपसरपंच,पदाधिकारी व कार्यकर्ते मोठया संख्येने उपस्थित होते.

चौकट: चर्चा तर होणारच..! 

जिल्हा निवडणुकीत पराजय आम्हाला दिसत होता मात्र……

उद्याचा निकाल काय लागणार आहे महाविकास आघाडी तयार करायची आहे,जिल्हा बँकेच्या एकत्र निर्णय घ्यायचा आहे असे राष्ट्रवादी पक्षाचे राज्यातील वरिष्ठ नेते सांगत होते मात्र शेवटच्या  क्षणापर्यंत आम्हाला अंधारात ठेवले आमची तीच काँग्रेसची अवस्था होती.याबाबत मी लवकरच मुख्यमंत्री उद्धव ठाकरे यांच्याशी सविस्तर चर्चा करणार आहे आणि पक्षप्रमुख आदेश येईल तो मानणारा मी शिवसैनिक आहे 

चौकट:माझ्या भोंग्याची इतकी भीती का वाटते?

माझ्या पक्षाने मला मंत्री केले दादा मग माझ्या मंत्रिपदाला आणि माझ्या गाडीच्या भोंग्याला  एवढे का घाबरतात हेच मला कळत नाही. अहो दादा, मी  गृहखात्याचा मंत्री आहे आणि या खात्याचा नियमच आहे भोंगा म्हणचे सायरन वाजला पाहिजे त्यामुळेच मी जेथे जातो तेथे गल्लीबोळात ही भोंगा वाजतोच.तुमच्या माहितीसाठी म्हणून सांगतो हा भोंगा केवळ पाटण मतदार संघात वाजत नाही तर संपूर्ण राज्यभर माझा हा भोंगा वाजत असतो आणि त्याची जास्तच भीती वाटत असेल तर मंत्रिपद भोगलेल्या आपल्या दादांना एकदा तरी विचारा की कोणत्या खात्याला भोंगा असतो ते ? असा उपरोधक टोला गृहराज्यमंत्री शंभुराज देसाई यांनी लगावला.

चौकट:आता सुपरहिट 'शोले'  दाखवणार………

मंत्री शंभुराज देसाई विरोधकांनी 'ट्रेलर' संदर्भात केलेल्या वक्तव्याचा खरपूस समाचार घेतला.यावेळी ते  म्हणाले,अहो तुम्ही तर ट्रेलर ची भाषा करता मात्र ट्रेलर हा केवळ वातावरण निर्मितीसाठी  दाखवतात  'ट्रेलर' नंतर सिनेमा चालेल की नाही याची शास्वती नसते  तो प्लॉप ही होतो मात्र आम्ही जो आता २०२४ मधील होणाऱ्या सिनेमाचे केवळ ट्रेलर न दाखवता तो 'शोले' सारखा 'सुपरहिट' पिक्चर असणार आहे. जो कायमस्वरूपी जनतेच्या स्मरणात राहील.त्यामुळे ट्रेलरची भाषा आमच्यापुढे करू नका असा टोला ही मंत्री देसाई यांनी लगावला.

 

पाटण मतदारसंघातील जनतेने सात वर्षापूर्वीच तुमचा आवाज बंद केल्याचे भान राखावे. गृहराज्यमंत्री शंभुराज देसाई यांचे सत्यजित पाटणकर यांना प्रतिउत्तर.

दौलतनगर दि.25(जनसंपर्क कक्ष,राज्यमंत्री कार्यालय):- मंत्री पदासाठी तेवढेच कर्तृत्व ही लागते आणि त्यासाठी जनतेत मिसळावे लागते,सर्व सामान्य जनतेची कामे तळमळीने करावी लागतात,त्याला कोणच्याही मेहरबानीची गरज लागत नाही. सातारा जिल्हा बँकेचे नवनिर्वाचित संचालक सत्यजितसिंह पाटणकर यांना उठता बसता माझ्या मंत्री पदाची भीती का वाटते मला माहित नाही.मात्र मला मंत्री पद मेहरबानी वर मिळाल्याची भाषा करणारे सत्यजितसिंह आपल्यावर तर अनेक वर्षांपासून ज्या पक्षाची मेहरबानी आहे.मग  त्या मेहरबानी वर आपण आमदार का बनू शकला नाही ? तालुक्यातील सर्वसामान्य जनतेने तुमची निष्क्रियता ओळखूनच धनशक्तीच्या जोरावरील तुमची सत्तेची मस्ती उतरवत आपल्याला घरी बसवले असून सात वर्षापूर्वीच तुमचा आवाज बंद केल्याचे भान राखावे,असे प्रति उत्तर गृहराज्यमंत्री ना. शंभूराज देसाई यांनी दिले.ते दौलतनगर ता.पाटण येथे पत्रकारांशी बोलत होते.

               ना.शंभूराज देसाई म्हणाले की, ज्यांनी आजपर्यंत वर्षानुवर्षे जिल्हा बँकेचे संचालक पद  घेऊन ही केवळ हाताची घडी आणि तोंडावर  बोट ठेवून पाटण तालुक्यालाच नव्हे तर संपूर्ण जिल्ह्यातील  शेतकऱ्यांचे नुकसान केले आणि आता घराणे शाहीने पुन्हा त्याच पदावर मुलाला बसवून पुन्हा मागचे तेच पुढे होणार आहे.त्यामुळे आमच्या मंत्रिपदाची जास्त काळजी तुम्ही करण्याची गरज नाही.मंत्री पद हे पैशाचा माज दाखवून कधी मिळत नाही ते मिळविण्यासाठी जनतेचे प्रेम,कर्तृत्व आणि पक्षावरील निष्ठा लागते आणि याची माहिती आपण आपल्या वडिलांकडून घेतली असती तर अधिक बरे झाले असते.मात्र अर्ध्या हळकुंडाने पिवळे होणाऱ्यांना काय समजणार असा सवाल करून मंत्री देसाई म्हणाले,राज्यातील आघाडी सरकार हे  तिन्ही पक्षांचे सरकार आहे हे केवळ एका पक्षाचे सरकार नाही याचे भान ठेवून आपली वक्तव्ये करावीत आणि मगच कुणाच्या मेहरबानीवर कुणाला मंत्रीपदे मिळाली असली बेताल वक्तव्ये करावीत. जिल्हा बँकेची केवळ १०२ मतदारांची निवडणूक जिंकली म्हणून आपण पाटण मतदार संघातील सर्वसामान्य जनतेची निवडणूक जिंकली  नाही. त्यामुळे आपला आत्ताच इतका थयथयाट बरा नाही. अजून बऱ्याच निवडणुका व्हायच्या आहेत.तालुक्यातील निवडणुका आमच्यासाठी काही नविन नाहीत.आम्हीही या निवडणुकांमध्ये तुमच्याशी दोन हात करायला माझ्या कार्यकर्त्यांसह तयार असल्याचे सांगत ना. शंभूराज देसाई पुढे म्हणाले,पाटण नगरपंचायतीच्या निवडणुकीमध्ये पक्षाची निष्ठा सोयीनुसार गुंडळून ठेवणाऱ्यांनी आम्हाला पक्षनिष्ठा शिकविण्याची गरज नाही. तसेच जिल्हा परिषद,पंचायत समिती निवडणुकीमध्ये आतापर्यंत तुम्ही कोणा-कोणाला खुणावले हे ही तालुक्याने पाहिले आहे.जिल्हा मध्यवर्ती बँकेच्या निवडणुकीत विजयाची खात्री असताना मग तुम्ही ते मतदार एक महिनाभर वेग-वेगळया ठिकाणी का फिरवत होता.त्यांना दिपावलीसारखा मोठा सण असतानाही कुटुंबियांसमवेत न ठेवता त्यांच्या हातामध्ये गंडेदोरे का बांधले हेही जनतेला सांगीतले तर बर होईल.त्यामुळे केवळ 14 मते घेऊन विजयाने हुरळून गेलेल्या सत्यजितसिंह यांना माझ्या मंत्री पदाचा राजीनामा मागण्या एवढी आपली राजकीय उंची तरी आहे का ? असा हल्लाबोल मंत्री देसाई यांनी केला.सर्व सामान्य जनता ही कोणा बरोबर आहे हे नुकतेच झालेल्या ग्रामपंचायत निवडणुकीच्या निकालावरुन स्पष्ट झाले आहे.त्यामुळे ते तुम्ही वेगळे सांगण्याची गरज नसून लोकप्रतिनिधी म्हणून सर्व सामान्य जनतेची कामे करण्याची मी सक्षम असून तुमच्या निष्क्रीयतेमुळेच तुम्हाला घरी बसविले असल्याने तुम्ही जनतेच्या प्रश्नांचा उसना कळवळा आणू नका.लोकप्रतिनिधी म्हणून जनतेची कामे करण्यासाठी आम्हीच खंबीर आहोत,असे स्पष्ट करून मंत्री देसाई म्हणाले,मी राज्यातील महाविकास आघाडी सरकारमधील एक जबाबदार राज्यमंत्री आहे. शिवसेना या पक्षाचे जिल्ह्याचे प्रतिनिधित्व  राज्याचे मुख्यमंत्री उद्धवजी ठाकरे यांच्या मार्गदर्शनाखाली मंत्रिमंडळात करतो. त्यामुळे मला माझ्या पक्षाबरोबर आणि पक्षप्रमुख यांच्याबरोबर वरिष्ठ पातळीवर चर्चा कराव्या लागतात आणि त्या मी करणारच आहे.त्याबद्दल आपणाला  नाक खुपसण्याची  गरज नाही आणि आपली तेवढी राजकीय उंची  नाही. माझे राज्यातील सर्वच राजकीय पक्षातील नेत्यांशी आपुलकीचे संबंध आहेत आपण पाच वर्षातून केवळ निवडणुकीपूरतेच वाडयातून बाहेर पडता हे ही जनतेलाही माहीत आहे त्यामुळे आपणाला वाड्याबाहेरील संबंध कसे जपतात याची कल्पना काय असणार त्यामुळे इतरांच्या बरोबर असलेली आपुलकी, जिव्हाळ्याचे संबंध आणि घरोबा यातला फरक आपणाला काय कळणार? असा खोचक टोला ही त्यांनी सत्यजितसिंह यांना केला.तसेच दोन हात करण्याची भाषा आम्हाला करू नये,आम्हीही यापुढे जशास तसे उत्तर द्यायला नेहमीच तयार आहे.असा इशाराही ही शेवटी मंत्री देसाई यांनी शेवटी दिला.

गृहराज्यमंत्री ना.शंभूराज देसाई यांचे विशेष प्रयत्नातून नगरविकास मंत्री ना.एकनाथ शिंदे यांचेकडून पाटण नगरपंचायतीकरीता 05 कोटींचा निधी मंजूर.

 

दौलतनगर दि.23 (जनसंपर्क कक्ष,राज्यमंत्री कार्यालय):- पाटण या तालुक्याच्या ठिकाणी  नगरपंचायतीच्या  क्षेत्रामध्ये  आवश्यक असणाऱ्या विकास कामांना महाराष्ट्र शासनाच्या नगरविकास विभागाकडून तातडीने निधी मंजूर होणेकरीता महाराष्ट्र राज्याचे गृहराज्यमंत्री ना.शंभूराज देसाई यांनी नगरविकास मंत्री ना. एकनाथजी शिंदे यांचेकडे 05 कोटी रुपयांचा निधी मंजूर करण्याकरीता सातत्याने पाठपुरावा केला होता.गृहराज्यमंत्री ना. शंभूराज देसाई यांनी केलेल्या शिफारशीनुसार पाटण नगरपंचायतीचे क्षेत्रामध्ये नागरी सुविधा पुरविण्याच्या  विविध विकास कामांना 05 कोटी रुपयांचा निधी वितरित केला असल्याचा शासन निर्णय राज्य शासनाच्या नगरविकास विभागाने पारीत केला असल्याची माहिती ना.शंभूराज देसाई यांचे कार्यालयाचे वतीने प्रसिध्दीपत्रकांत देण्यात आली आहे.

              प्रसिध्दीपत्रकांत पुढे म्हंटले आहे की, पाटण नगरपंचायतीचे क्षेत्रामध्ये नागरी सुविधांची अनेक कामे गेली अनेक वर्ष प्रलंबित असल्याने येथील नागरीकांची मोठी गैरसोय होत होती. तसेच पाटण शहर हे तालुक्याचे ठिकाण असल्याने सदरची नागरी सुविधांची कामे मंजूर होण्यासाठी गृहराज्यमंत्री ना. शंभूराज देसाई यांनी नगरविकास मंत्री ना.एकनाथजी शिंदे यांचेकडे शिफारस केली होती.ना.शंभूराज देसाई यांनी केलेल्या शिफारशीनुसार पाटण नगरपंचायतीचे क्षेत्रामध्ये नागरी सुविधांचे  विविध विकास कामासाठी राज्याचे नगरविकास विभागाने 05 कोटी रुपयांचा निधी मंजूर केला असल्याचा शासन निर्णय पारित केला आहे.या शासन निर्णयानुसार पाटण नगरपंचायती अंतर्गत पुढीलप्रमाणे असणाऱ्या विविध विकास कामांना निधी मंजूर करण्यात आला आहे.यामध्ये पाटण नगरपंचायत येथे साठवण टाकीसह जलशुध्दीकरण प्रकल्प  100 लाख,रामापूर पाटण प्रभाग क्र. 14 येथे शादीखाना इमारत 50 लाख,झेंडा चौक,लायब्री चौक ते स्टेट बँकेपर्यंतचा मुख्य रस्ता डांबरीकरण 25 लाख,प्रभाग क्र. 1 राजेंद्र जाधव यांचे घरापासून पिंटू गुरव यांचे घरापर्यंतचा 200 मी. रस्ता 10 लाख,प्रभाग क्र. 2 जयवंतराव लुगडे यांचे घरापासून विठ्ठल मंदीरापर्यंत तसेच सागर माने यांचे घरापासून निनाई मंदिरापर्यंत 400 मी. रस्ता खडीकरण,डांबरीकरण 15 लाख,प्रभाग क्र. 2 विठ्ठलनगर येथील श्री. महादेव जाधव यांचे घरापासून परशुराम निवास पर्यंत रस्ता व आर.सी.सी.गटर बांधकाम व प्रभाग क्र. 3 राजेंद्र झुंजार यांचे घरापासून निनाई मंदिरापर्यंत आर.सी.सी.गटर 125 मी. बांधकाम 15 लाख,प्रभाग क्र. 05 अभिजीत खांडके यांचे घरापासून ते अरुण गोसावी यांचे घरापर्यंत रस्ता  काँक्रीटीकरण व प्रभाग क्र. 11  अभिजीत यादव घर ते निलेश गायकवाड घरापर्यंतचा अंतर्गत रस्ते काँक्रीटीकरण  16 लाख,प्रभाग क्र. 13  मुळगाव पुल ते झेंडा चौक रस्त्यावरील साकव 40 लाख,प्रभाग क्र. 13  मुळगाव पुल ते झेंडा चौक रस्ता डांबरीकरण 10 लाख,प्रभाग क्र. 15 रेव्हिन्यू कॉलनी येथील नामदेवराव झगडे यांचे घर ते सुनिल पानस्कर यांचे घरापर्यंत दोन्ही रस्त्यास सिमेंट काँक्रीट रस्ता,आर.सी.सी.गटर 15 लाख,प्रभाग क्र. 15 रेव्हिन्यू कॉलनी येथील महेश साळुंखे यांचे घर ते किर्पेकर यांचे घरापर्यंत रस्त्याच्या दोन्हीही बाजूस आर.सी.सी.गटर बांधकाम व प्रभाग क्र. 15 मोरे यांचे घरापासून श्री केळकर यांचे घरापर्यंत रस्ता 100 मी. सिमेंट काँक्रीटीकरण 17 लाख,प्रभाग क्र. 15  रेव्हयूनी गणेश मंदिर परिसरामधील जागेमध्ये उद्यान व परिसर सुधारणा व प्रभाग क्र. 16 लक्ष्मण कांबळे यांचे घरापासून गणपत कांबळे यांचे घरापर्यंत रस्ता 150 मी. सिमेंट काँक्रीटीकरण 23 लाख,प्रभाग क्र. 17 मारुती मंदिरासमोर ते दर्गापर्यंत रस्ता डांबरीकरण 15 लाख,प्रभाग क्र. 17 जहांगिर शेख यांचे घर ते मुस्लिम दर्गापर्यंत पर्यंत आर.सी.सी.गटर बांधकाम व प्रभाग क्र. 17 महबूब शेख यांचे घरापासून ते माधव भिसे यांचे घरापर्यंत रस्ता सिमेंट काँक्रीटीकरण 17 लाख,प्रभाग क्र. 17 पिरजादे यांचे घरापासून ते कोयना नदीपर्यंतचा रस्ता डांबरीकरण 10 लाख,प्रभाग क्र. 17 विष्णू लोहार यांचे घरापासून बापूराव बंडलकर यांचे घरापर्यंत रस्ता काँक्रीटीकरण व आर.सी.सी. गटर 15 लाख,प्रभाग क्र. 17 मुस्लिम दर्गा परिसर सुशोभिकरण व पथदिवे  व प्रभाग क्र. 17  मध्ये रामोशी समाज लादीकरण 17 लाख,प्रभाग क्र. 16 मारुती मंदिर ते शासकीय विश्रामगृह पर्यंतचा रस्ता सुधारणा 20 लाख,प्रभाग क्र. 14 मारुती मंदिर सार्वजनिक सभागृह परिसराचे सुशोभिकरण 20 लाख,प्रभाग क्र. 03 परशूराम बिल्डिंग ते प्रदिपू साळूंखे घर रस्ता सिमेंट काँक्रीटीकरण 20 लाख,प्रभाग क्र. 03 अवघडे घर ते कुंभार सर घर रस्ता सिमेंट काँक्रीटीकरण 15 लाख,प्रभाग क्र. 17 कराड चिपळूण रस्ता ते कोयना नदीपर्यंत कुरण रस्ता खडीकरण डांबरीकरण 15 लाख असा एकूण 05 कोटींचा निधी नगरविकास विभागाकडून मंजूर करण्यात आला आहे..राज्याचे नगरविकास विकास मंत्री ना.एकनाथ शिंदे यांनी पाटण नगरपंचायतीच्या क्षेत्रामध्ये नागरी सुविधा पुरविण्याच्या कामांना भरघोस निधी मंजूर केल्याबद्दल ना.शंभूराज देसाई यांनी आभार मानले.लवकरच या मंजूर कामांची निविदा प्रक्रीया होऊन तातडीने हि कामे मार्गी लागणार असल्याचे शेवठी पत्रकात म्हटले आहे.

लोकनेते बाळासाहेब देसाई व स्व.शिवाजीराव देसाई(आबासाहेब) यांच्या स्वप्नातील तालुका घडविण्यासाठी प्रयत्नशील- नामदार शंभूराज देसाई स्व.शिवाजीराव देसाई (आबासाहेब)यांचा ७8 व्या जयंती सोहळा संपन्न.

 

दौलतनगर दि.20(जनसंपर्क कक्ष,राज्यमंत्री कार्यालय):-पाटण तालुक्यात अत्यंत  प्रतिकूल परिस्थितीमध्ये स्व.शिवाजीराव देसाई आबासाहेब यांनी लोकनेते बाळासाहेब देसाई  कारखान्याची उभारणी केली. कारखाना उभा करीत असताना अनेक संकटे आली. यातील काही संकटे ही नैसर्गिक तर काही संकटे ही मानवनिर्मित होती. त्या सर्व संकटांना  न डगमगता धाडसाने जिद्दीने सामोरं जात  साखर कारखान्याची जबाबदारी  त्यांनी लिलया पेलली. आणि मुदतपूर्व कारखाना उभा केला. त्यामुळे मरळीचा माळरान परिसर हा विकसित झालेला दिसतो. त्या पाठीमागे लोकनेते बाळासाहेब देसाई आणि कै.शिवाजीराव देसाई यांच्या विचारांची  प्रेरणा आहे. राज्याचे मुख्यमंत्री ना.उद्धव ठाकरे यांच्या नेतृत्वाखाली महाविकास आघाडी सरकारमधील राज्यमंत्री म्हणून  लोकनेते बाळासाहेब देसाई व स्व.शिवाजीराव देसाई (आबासाहेब) यांचे स्वप्नातील तालुका घडविण्यासाठी प्रयत्नशिल राहणार असून पाटण विधानसभा मतदारसंघाचा सर्वांगीण  विकास करण्याचा आपला प्रयत्न असल्याची ग्वाही गृहराज्यमंत्री ना.शंभूराज देसाई यांनी दिली.

             दौलतनगर ता.पाटण येथे लोकनेते बाळासाहेब देसाई सहकारी साखर कारखान्याचे संस्थापक चेअरमन स्व. शिवाजीराव देसाई (आबासाहेब) यांचे  ७8 वा जयंती सोहळा कार्यक्रमप्रसंगी ते बोलत होते.याप्रसंगी मोरणा शिक्षण प्रसारक मंडळाचे अध्यक्ष रविराज देसाई,युवा नेते मा.यशराज देसाई,कारखान्याचे चेअरमन अशोकराव पाटील,व्हाईस चेअरमन राजाराम पाटील,शिवदौलत बँकेचे चेअरमन मिलींद पाटील, ॲड.डी.पी.जाधव,प्रकाशराव जाधव,बबनराव भिसे,गजानन जाधव,शंकर शेजवळ,आनंदराव चव्हाण,संपतराव सत्रे, अशोकराव डिगे,बाळासो पाटील,नामदेवराव साळूंखे,विजय शिंदे, सुरेश पानस्कर,अभिजित पाटील,संजय देशमुख,बशीर खोंदू, सौ.दिपाली पाटील,सौ.विश्रांती जंबुरे,या प्रमुख मान्यवरांसह कारखान्याचे संचालक मंडळ,पंचायत समिती,जिल्हा परिषद सदस्य यांच्यासह प्रमुख पदाधिकारी,कार्यकर्ते यांची प्रमुख उपस्थिती होती.प्रारंभी नामदार शंभूराज देसाई यांनी आदरणीय लोकनेते बाळासाहेब देसाई, स्व.शिवाजीराव देसाई (आबासाहेब) यांचे समाधी व पुर्णाकृती पुतळयास पुष्पचक्र अर्पण करुन विनम्र अभिवादन केले.

              गृहराज्यमंत्री ना. शंभूराज देसाई याप्रसंगी म्हणाले की,  लोकनेते बाळासाहेब देसाई यांच्या शब्दा खातर मरळीच्या माळरानावर  साखर कारखाना  उभा करण्याची  जबाबदारी कै.आबासाहेब  यांनी  लिलया पार  पाडली. आबासाहेबांनी  केलेल्या  या महत्त्व पूर्ण कार्याचे  ऋृण  तालुक्यातील  तुम्हा शेतक-यांना कधीही  विसरता येणारे नाही.मरळीच्या माळरानावर सहकारी साखर कारखान्याची उभारणी झाली नसती तर आज पाटण तालुक्यातील शेतक-यांची  आणि  या विभागाची परिस्थिती काय असती याचा ही सारासार विचार करणे गरजचे आहे. मरळीचे  माळरान दौलतनगर परिसर म्हणून विकसित झालेला दिसतो आहे.त्या पाठिमागे लोकनेते बाळासाहेब देसाई आणि कै.शिवाजीराव देसाई यांची प्रेरणा आहे.प्रसिध्द पर्यटन स्थळ म्हणून  हा परिसर नावारूपाला येताना दिसत असल्याचे सांगून ते पुढे म्हणाले की, पाटण  विधानसभा मतदारसंघाचे तिसऱ्यांदा आमदार होण्याची संधी मला मिळाली. ५० वर्षानंतर मंत्री पद देसाई घराण्यात आले.मिळालेल्या सत्तेचा उपयोग हा प्रथम आपल्या मतदारसंघातील विकास कामे करण्यासाठी झाला पाहिजे. दुर्गम आणि डोंगरी असलेला हा विधानसभा मतदारसंघ विकासाच्या बाबतीत रोल मॉडेल करण्याचा प्रयत्न आहे. त्या माध्यमातून लोकनेते बाळासाहेब देसाई आणि कै.शिवाजीराव देसाई या दोन नेत्यांनी पाहिलेलं स्वप्न सत्यता उतरण्याचे काम केले.राजकीय जीवनामध्ये काम करत असताना चढ उतार असतात. आमदारकी मिळवण्यासाठी आपल्याला २१ वर्ष संघर्ष करावा लागला. मोठ्या राजकीय ताकदीच्या आणि सत्तेच्या विरोधात २००४ साली सामान्य जनतेने परिवर्तन केले. आणि आमदारकी आपल्या ताब्यात आली.त्या माध्यमातून विकासाची कामे करण्यासाठी आपण कधीच कमी पडलो नाही. राज्याचे मुख्यमंत्री ना.उद्धव ठाकरे यांच्या नेतृत्वाखाली महाविकास आघाडी सरकारमधील राज्यमंत्री म्हणून  सर्वांगीण विकास करण्याचा आपला प्रयत्न असल्याचे सांगत लोकनेते बाळासाहेब देसाई व स्व.शिवाजीराव देसाई (आबासाहेब) यांचे स्वप्नातील तालुका घडविण्यासाठी प्रयत्नशिल राहणार असल्याचे शेवटी ते म्हणाले.

शिवसेनाप्रमुख स्व.बाळासाहेब ठाकरे यांचे नवव्या पुण्यस्मरण दिनानिमित्त नामदार शंभूराज देसाईंचे हस्ते गोरगरीब महिलांना ब्लँकेटचे वाटप.

 

दौलतनगर दि.२०(जनसंपर्क कक्ष,राज्यमंत्री कार्यालय):-हिंदुहृदयसम्राट शिवसेनाप्रमुख स्व.बाळासाहेब ठाकरे यांचे नवव्या पुण्यस्मरण दिनानिमित्ताने दौलतनगर ता.पाटण येथे लोकनेते बाळासाहेब देसाई सहकारी उद्योग व शिक्षण समुहाच्यावतीने समुहाचे प्रमुख महाराष्ट्र राज्याचे गृहराज्यमंत्री नामदार शंभूराज देसाई यांच्या प्रमुख उपस्थितीत दि.१७ नोव्हेंबर,रोजी शिवसेनाप्रमुख स्व.बाळासाहेब ठाकरे यांना विनम्र अभिवादन करण्यात आले.यावेळी शिवसेनाप्रमुख स्व.बाळासाहेब ठाकरे यांचे नवव्या पुण्यस्मरण दिनानिमित्ताने पाटण मतदारसंघातील गोरगरीब कुटुंबातील महिलांना नामदार शंभूराज देसाई यांचे हस्ते ब्लँकेटचे वाटप करण्यात आले.

दौलतनगर,ता.पाटण येथे लोकनेते बाळासाहेब देसाई सहकारी उद्योग व शिक्षण समुहाच्यावतीने प्रतिवर्षी हिंदुहृदयसम्राट शिवसेनाप्रमुख स्व.बाळासाहेब ठाकरे यांचा पुण्यस्मरण दिनाचा कार्यक्रम आयोजीत करण्यात येतो.यंदाच्या वर्षी शिवसेनाप्रमुख यांचे नवव्या पुण्यस्मरण दिनाचे व यानिमित्ताने पाटण मतदारसंघातील गोरगरीब कुटुंबातील महिलांना ब्लँकेटचे वाटपाचा कार्यक्रम दि.१७ नोव्हेंबर रोजी आयोजीत करण्यात आला होता.या दिनानिमित्ताने लोकनेते बाळासाहेब देसाई सहकारी उद्योग व शिक्षण समुहाच्यावतीने समुहाचे प्रमुख, महाराष्ट्र राज्याचे गृहराज्यमंत्री नामदार शंभूराज देसाई यांच्या प्रमुख उपस्थितीत प्रथमत: शिवसेनाप्रमुख स्व.बाळासाहेब ठाकरे यांना विनम्र अभिवादन करण्यात येवून त्यांच्या पुण्यस्मरण दिनाच्या निमित्ताने या पाटण मतदारसंघातील गरीब कुटुंबातील महिलांना त्यांचे शुभहस्ते ब्लँकेटचे वाटप करण्यात आले. या कार्यक्रमास पाटण मतदारसंघातील शिवसेना,युवासेना पदाधिकारी,कार्यकर्ते व विविध संस्थांचे पदाधिकारी हे मोठया संख्येने उपस्थित होते.

याप्रसंगी हिंदुहृदयसम्राट शिवसेनाप्रमुख स्व.बाळासाहेब ठाकरे यांना अभिवादन करताना  नामदार शंभूराज देसाई म्हणाले, हिंदुहृदयसम्राट शिवसेनाप्रमुख स्व.बाळासाहेब ठाकरे आणि महाराष्ट्राचे पोलादी पुरुष आदरणीय लोकनेते बाळासाहेब देसाई यांचे जिव्हाळयाचे ऋृणानुबंध होते. हिंदुहृदयसम्राट शिवसेनाप्रमुख स्व.बाळासाहेब ठाकरे यांनी शिवसेना पक्षाची स्थापना करताना लोकनेते बाळासाहेब देसाई यांनी त्यांना मोलाचे सहकार्य केले होते हे अवघा महाराष्ट्र जाणून आहे.शिवसेनाप्रमुख स्व.बाळासाहेब ठाकरे यांनी मराठी माणसाच्या हितरक्षणासाठी आणि हिंदुत्वाच्या प्रसारासाठी आपल्या कर्तृत्व आणि वक्तृत्वाची तलवार अनेक वर्षे तळपती ठेवली.तेजस्वी नेतृत्व आणि तमाम मराठी जनतेच्या मनात आदरणीय स्थान प्राप्त करणारे हिंदुहृदयसम्राट शिवसेनाप्रमुख स्व. बाळासाहेब ठाकरे यांनी महाराष्ट्रात सत्ता असताना आणि सत्तेबाहेर असतानाही राज्याच्या राजकारणावर आपला रिमोट कंट्रोल कायम ठेवला. सत्ताधीशांच्या प्रत्येक कृतीवर आणि उक्तीवर व्यंगचित्रातून टिप्पणी करून सत्ताधीशांचीही भंबेरी उडविण्याची शक्ती शिवसेनाप्रमुख बाळासाहेब ठाकरे यांच्या लेखणीत आणि प्रखर वक्तृत्वातही होती.मराठी माणसाच्या मनात आपल्या मराठीपणाचा अभिमान रुजविण्याचा वसा त्यांनी शिवसेनेच्या स्थापनेपासून अविरतपणे चालविला आणि पार पाडला.आपल्या लेखणीतून,व्याख्यानांतून आणि लोकजागरण मोहिमांमधून समाजातील अनिष्ट रूढी-परंपरांवर कोरडे ओढणारे प्रबोधनकार ठाकरे यांच्या विचारांनी प्रेरित होऊन शिवसेनाप्रमुख बाळासाहेब ठाकरे यांनी १९ जून १९६६ या दिवशी महाराष्ट्रात शिवसेनेची स्थापना केली शिवसेनेच्या स्थापनेपासून हिंदुहृदयसम्राट बाळासाहेब ठाकरे ही एक झंझावाती शक्ती म्हणून महाराष्ट्राच्या राजकारणात उदयास आली आणि स्व.बाळासाहेब ठाकरे यांना उभा महाराष्ट्र शिवसेनाप्रमुख व हिंदुहृदयसम्राट म्हणून ओळखू लागला.आज हिंदुहृदयसम्राट शिवसेनाप्रमुख बाळासाहेब ठाकरे हे हयात नाहीत परंतू त्यांनी दिलेले आदर्श विचारांतून शिवसेना पक्षाची व संघटनेची वाटचाल सुरु आहे.आज महाराष्ट्र राज्याचे लोकप्रिय मुख्यमंत्री उध्दवजी ठाकरे यांचे नेतृत्वाखालील सरकारमध्ये महत्त्वाच्या पाच खात्यांची जबाबदारी मुख्यमंत्री यांनी आपल्यावर सोपवली आहे. स्व.बाळासाहेब ठाकरे व लोकनेते बाळासाहेब देसाई यांचे आदर्श विचारांचा वारसा जोपासत मुख्यमंत्री उध्दवजी ठाकरे यांनी दिलेली जबाबदारी समर्थपणे यशस्वी करण्यासाठी प्रयत्नशील राहणार आहे. हिंदूहृदयसम्राट शिवसेनाप्रमुख बाळासाहेब ठाकरे यांना नवव्या पुण्यस्मरण दिनानिमित्ताने पाटण विधानसभा मतदारसंघातील तमाम शिवसैनिक व आदरणीय लोकनेते बाळासाहेब देसाई सहकारी उद्योग व शिक्षण समुहाच्यावतीने मी विनम्र अभिवादन करतो.असे ते शेवठी म्हणाले.

गृहराज्यमंत्री ना.शंभूराज देसाई यांचे आवाहनाला युवकांनी दिली साद. महारक्तदान शिबीरामध्ये 1111 युवकांनी उत्स्फुर्तपणे सामाजिक बांधिलकी जपत केले रक्तदान.

 

दौलतनगर दि.18(जनसंपर्क कक्ष,राज्यमंत्री कार्यालय):-  गेली दोन वर्ष महाराष्ट्र राज्यासह संपूर्ण देश हा कोविड 19 या आजाराशी निकराने लढा देत आहे.अशा या महामारीच्या काळामध्ये विविध दवाखान्यांमध्ये अनेक आजारांवर उपचार घेणाऱ्या रुग्णांना रक्ताची मोठी गरज भासत आहे. परंतु सध्या रक्तपेढीमध्ये कमी प्रमाणांत रक्तसाठा उपलब्ध असल्याने रक्त आवश्यक असलेल्या रुग्णांची होणारी गैरसोय लक्षात घेऊन महाराष्ट्र राज्याचे गृहराज्यमंत्री नामदार शंभूराज देसाई यांचे संकल्पनेतून नामदार शंभूराज देसाई वाढदिवस नियोजन समिती यांचेवतीने दौलतनगर,ता.पाटण येथे महारक्तदान शिबीराचे आयोजन केले होते.या महारक्तदान शिबीरामध्ये गृहराज्यमंत्री ना.शंभूराज देसाई यांनी दि. 17 नोव्हेंबर रोजीचे वाढदिवसाचे औचित्य साधून पाटण विधानसभा मतदार संघातील जास्तीत जास्त युवकांनी रक्तदान करण्याच्या केलेल्या आवाहनाला युवकांनीही साद दिली. दौलतनगर,ता.पाटण येथील महारक्तदान शिबीरामध्ये तब्बल 1111 रक्तदात्यांनी सामाजिक बांधिलकी जपत रक्तदान करुन सातारा जिल्हयात प्रथमच एकढया मोठया प्रमाणांत रक्तदात्यांनी रक्तदान केलेने हे महारक्तदान शिबीर यशस्वी झाले.

         महाराष्ट्र राज्याचे गृहराज्यमंत्री ना.शंभूराज देसाई यांचे संकल्प्नेतून त्यांचे वाढदिवसाचे औचित्य साधून दि.17 नोव्हेंबर, 2021 रोजी दौलतनगर, ता.पाटण येथे श्रीमती विजयादेवी देसाई ज्यूनिअर व सिनिअर कॉलेज दौलतनगर येथे महारक्तदान शिबिराचे आयोजन करण्यात आले होते. सकाळी 10.30 वा. महाराष्ट्र राज्याचे नगरविकास मंत्री ना.एकनाथजी शिंदे यांचे शुभहस्ते या महारक्तदान शिबीराचे उद्घाटन केले. दरम्यान वाढदिवसाचे औचित्य साधून ना.शंभूराज देसाई यांनी आयोजित केलेल्या महारक्तदान शिबीरासारख्या सामाजिक उपक्रमाचे त्यांनी कौतूकही केले. ग्रामीण भागामध्ये महा रक्तदान शिबीराचे आयोजन करुन  एक आदर्श निर्माण करण्याचे काम मंत्री शंभूराज देसाई यांनी महाराष्ट्रामध्ये  केले असल्याचे ना.एकनाथ शिंदे यांनी यावेळी सांगीतले. त्यानंतर त्यांनी  रक्तदान सुरु असलेल्या ठिकाणी रक्तदात्यांना भेटून त्यांची  विचारपूसही केली. तसेच रक्तदान केलेल्या रक्तदात्यांचा प्रमाणपत्र देऊन सत्कारही केला.  या महारक्त्दान शिबीरामध्ये महालक्ष्मी रक्तपेढी कराड, बालाजी रक्तपेढी सातारा, अक्षय रक्तपेढी सातारा, यशवंतराव चव्हाण रक्तपेढी कराड, उपजिल्हा रुग्णालय रक्तपेढी कराड, कृष्णा हॉस्पीटल रक्तपेढी कराड, सिव्हिल हॉस्पीटल रक्तपेढी सातारा, माऊली रक्तपेढी सातारा या आठ रक्तपेढया महारक्तदान शिबिरामध्ये सहभागी झाल्या होत्या.गृहराज्यमंत्री ना.शंभूराज देसाई यांचे मार्गदर्शनाखाली नामदार शंभूराज देसाई वाढदिवस नियोजन समिती व आरोग्य विभाग यांचे समन्वयाने या महारक्तदान शिबीराचे आयोजन केले होते. पाटण विधानसभा मतदारसंघातील रक्तदात्यांनी सकाळपासूनच  महारक्तदान शिबीराचे ठिकाणी  रक्तदान करण्यासाठी गर्दी केलेली होती. दरम्यान या महारक्तदान शिबीरामध्ये जास्तीत जास्त रक्तदात्यांनी रक्तदान करण्याचे आवाहन ना.शंभूराज देसाई यांनी केले होते. त्यानुसार या महारक्तदान शिबीरामध्ये तब्बल 1111 रक्तदात्यांनी रक्तदान केल्याने गृहराज्यमंत्री नामदार शंभूराज देसाई यांचे आवाहनाला मतदारसंघातील युवकांनी साद दिल्यानेच हे महारक्तदान शिबीर यशस्वी झाले. हे शिबीर यशस्वी करण्यासाठी वाढदिवस नियोजन समितीचे जि.प. सदस्य विजय पवार, प.स.सदस्य संतोष गिरी, शिवशाही सरपंच संघाचे विजय शिंदे, व तालुक्यातील विविध संस्थाचे पदाधिकारी तसेच आरोग्य विभागाचे जिल्हा शल्यचिकीत्सक डॅा.सुभाष चव्हाण, जिल्हा आरोग्य अधिकारी डॅा. राधाकिसन पवार, डॅा. सचिन पाटील, तालुका आरोग्य अधिकारी डॅा. खराडे, आरोग्य विभाग व महसूल विभागचे अधिकारी कर्मचारी अधिकारी यांनी विषेष परिश्रम घेतले.

चौकट:- ना.शंभूराज देसाई यांचे मार्गदर्शनाखाली महारक्तदान शिबीराचे यशस्वी नियोजन.

         गृहराज्यमंत्री ना.शंभूराज देसाई यांनी वाढदिवसाचे औचित्य साधून सामाजिक बांधिलकी जपण्याच्या हेतून महारक्तदान शिबीराचे आयोजन केले होते.या दिवशी दिवसभर असलेला व्यस्त कार्यक्रम तसेच शुभेच्छा देण्यासाठी येणाऱ्यांची मोठी गर्दी असूनही श्रीमती विजयादेवी देसाई ज्यूनिअर व सिनिअर कॉलेजमध्ये या महारक्तदान शिबीराचे ठिकाणी आवश्यक असलेल्या सर्व सुविधा रक्तदात्यांना या ठिकाणी उपलब्ध करुन देण्यात आल्या होत्या. रक्तदात्यांच्या नोंदणीपासून ते रक्तदानापर्यंत आणि रक्तदान झालेनंतर त्या रक्तदात्यांना चहा,नाष्टा देण्यापर्यंत नामदार शंभूराज देसाई वाढदिवस नियोजन समिती व आरोग्य विभाग यांनी चांगले नियोजन करुन हे महारक्तदान शिबीर यशस्वी करण्यासाठी मोठा हातभार लावला.