पाटण तालुक्यातील त्या ८६ नळ पाणी पुरवठा योजनांच्या पुर्नंबांधणीचे प्रस्ताव तात्काळ सादर करा. पाणी पुरवठा मंत्री ना.बबनराव लोणीकर यांच्या अधिकाऱ्यांना सक्त आदेश

­­

          दौलतनगर दि.20:-  पाटण तालुक्यात दि.२६ जुलै पासून झालेल्या मुसळधार अतिवृष्टीमुळे तसेच कोयना , मोरणा, वांग मराठवाडी व तारळी धरणातून मोठया प्रमाणात सोडण्यात आलेल्या पाण्यामुळे नदीकाठी असणाऱ्या तसेच डोंगराळ व दुर्गम भागातील एकूण ८६ गांवाच्या नळ पाणी पुरवठा योजनांच्या पुर्नंबांधणीकरीता आवश्यक निधी तात्काळ मंजुर करावा अशी मागणी पाटणचे आमदार शंभूराज देसाईंनी राज्याचे पाणी पुरवठा मंत्री ना.बबनराव लोणीकर यांचेकडे केली होती त्यानुसार पाटण तालुक्यातील त्या ८६ नळ पाणी पुरवठा योजनांच्या पुर्नंबांधणीचे प्रस्ताव मंजुरीकरीता तात्काळ सादर करा असे सक्त आदेश राज्याचे पाणी पुरवठा मंत्री ना.बबनराव लोणीकर पाणी पुरवठा विभागाच्या अधिकाऱ्यांना दिले आहेत.

             पाटण मतदारसंघात मोठया प्रमाणात झालेल्या अतिवृष्टीमुळे कोयना,मोरणा,वांग मराठवाडी व तारळी नदीकाठी तसेच डोंगराळ व दुर्गम भागातील अनेक गावांमधील सध्या अस्तित्वात असलेल्या नळ पाणी पुरवठा योजनांचे अतोनात नुकसान झालेले असून संबंधित गावांतील पिण्याचा पाण्याचा गंभीर प्रश्न निर्माण झाला आहे. अतिवृष्टी व महापुरामुळे पाणी पुरवठा योजनांचे पॅनेल बोर्ड पाण्यात जाऊन खराब झाले आहेत तर पाणी पुरवठा करणाऱ्या विहिरीमध्ये मोठया प्रमाणात गाळ साचलेला आहे.तसेच ग्रॅव्हीटीच्या योजनांच्या पाईपलाईनचे मोठे नुकसान झाले आहे. अनेक पाईप लाईन,इनटेक चेंबर नादुरुस्त, वाहून गेलेल्या व तुटलेल्या असून पाटण तालुक्यात अशा ८६ नळ पाणी पुरवठा असून याची पुर्नंबांधणी करण्याची निंतात गरज असल्याचे लेखी पत्र आमदार शंभूराज देसाईंनी पाणी पुरवठा मंत्री ना.बबनराव लोणीकर यांचेकडे दिले होते त्यानुसार पाणी पुरवठा मंत्री यांनी वरीलप्रमाणे आदेश दिले असून पाणी पुरवठा विभागाच्या अधिकाऱ्यांकडून या नळ पाणी पुरवठा योजनांचे पंचनामे करुन झालेल्या नुकसानीचे अंदाजपत्रक करण्याचे काम सध्या युध्दपातळीवर सुरु आहे. येत्या चार ते पाच दिवसात नुकसानीचा सर्व तपशिल राज्याच्या पाणी पुरवठा विभागाकडे गेल्यानंतर या पुर्नंबांधणीच्या कामांना आवश्यक असणारा निधी मंजुर होईल अशी माहिती आमदार शंभूराज देसाईंनी दिली आहे.

                           नळ पाणी पुरवठा योजनांची दुरुस्ती व पुर्नंबांधणी करण्याच्या कामांमध्ये नावडी, वेताळवाडी, निसरे,आबदारवाडी,गिरेवाडी,नारळवाडी,मंद्रुळहवेली,नवसरवाडी,नाडे,नाडोली,पापर्डे,आडूळपेठ,आडूळ गावठाण, येरफळे, चोपडी,त्रिपुडी,मुळगाव, लुगडेवाडी येरफळे, काळोली, बनपेठवाडी, तामकडे, येराड, शिरळ,नेरळे, जोतिबाचीवाडी, तळीये पश्चिम,कराटे, डोणीचावाडा वांझोळे, गुंजाळी, चाफळ, कोळेकरवाडी, शिंदेवाडी, आंब्रुळे, तारळे, धनगरवाडी तारळे, काटेवाडी तारळे, काढोली, जमदाडवाडी, लेंढोरी,काढणे, आंब्रग, आवर्डे, मंद्रुळकोळे, काळगाव, चोरगेवाडी काळगाव, चौगुलेवाडी काळगाव,भरेवाडी काळगाव, मुठ्ठलवाडी काळगाव, धामणी,मोरेवाडी सुर्वेवाडी, कसणी, निनाईचीवाडी,सतिचीवाडी कसणी, निगडे, मोडकवाडी जिंती, कोकीसरे, हुंबरणे,आंबेघर तर्फ मरळी, बाहे, महिंद,जानुगडेवाडी, माथणेवाडी, गमेवाडी, मसुगडेवाडी दाढोली, तावरेवाडी पाडळोशी, पाडळोशी,मसुगडेवाडी पाडळोशी,ढेबेवाडी, वाघळवाडी ढोरोशी, चिंचेवाडी वजरोशी, वाझोली, म्हावशी, गुजरवाडी म्हावशी,पेठशिवापूर,नहिंबे चिरंबे,दिक्षी, शिद्रुकवाडी,पाचगणी इनामवाडी,किसरुळे भराडवाडी, कोंढावळे चाफयाचा खडक,चाफेर,मेंढेघर कदमवाडी,सलतेवाडी बिबी,बिबी,तामिणे बौध्दवस्ती, तामिणे मानेवस्ती अशा एकूण 86 कामांचा समावेश असून याकरीता अंदाजे  0३  ते ०३.५० कोटी रुपयांचा निधी होण्याची मागणी पाणी पुरवठा विभागाने शासनाच्या पाणी पुरवठा विभागाकडे केली आहे.

चौकट:- शंभूराजेंचे प्रस्ताव आले आहेत, त्यास निधी दया मंत्रीमंडळ बैठकीत मुख्यमंत्र्यांचे आदेश.

             दि.१३ ऑगस्ट रोजीच्या मंत्रीमंडळाच्या मिटींगमध्ये पाणी पुरवठा मंत्री ना.लोणीकर यांनी पुरपरिस्थितीत नुकसान झालेल्या कामांसंदर्भात चर्चा करताना पाटणचे आमदार शंभूराज देसाईंनी पाण्याचे योजनांच्या पुर्नंबांधणीचे प्रस्ताव पहिले पाठविले आहेत त्यास मान्यता देणे गरजेचे बाब राज्याचे मुख्यमंत्री ना.देवेंद्र फडणवीस यांच्या निदर्शनास आणून दिल्यानंतर पाटणच्या योजनांना तात्काळ मान्यता दया असे आदेश मंत्री मंडळाच्या बैठकीतच दिले.

देशाचे रक्षण करणाऱ्या फौजींचा सन्मान लोकप्रतिनिधीपेक्षा मोठा- आमदार शंभूराज देसाई. नायब सुभेदार शशिकांत शेजवळ (फौजी) यांचा आमदार शंभूराज देसाईंचे हस्ते सत्कार.

           दौलतनगर दि.१८:- लष्करामध्ये भरती होवून फौजी,जवान आपले सारे घरदार,शेजार पाजार, नातेवाईक व मित्रपरीवार यांना सोडून प्रामाणिकपणे सिमेवर आपले कर्तव्य बजावत देशाचे रक्षण करत असतात.सच्चा हिंदूस्थानी म्हणून आपण सर्वजण देशाचे रक्षण करणाऱ्या फौजी तसेच जवांनाकडे पहात असतो.गावांकडे सामाजिक,राजकीय क्षेत्रात कार्य करणाऱ्या पदाधिकाऱ्यापेक्षा तसेच माझेसारखे मतदार संघाच्या लोकप्रतिनिधीपेक्षा लष्करातील फौजी व जवान यांचा सन्मान मोठा आहे. देशाचे रक्षण करणारे फौजी व जवान आपले सर्वांचे आदर्श असतात असे प्रतिपादन आमदार शंभूराज देसाईंनी केले.

           सुळेवाडी ता.पाटण येथील शशिकांत शेजवळ (फौजी) यांना नायब सुभेदार या पदावर बढती मिळालेबद्दल सुळेवाडी ग्रामस्थांच्या वतीने तालुक्याचे आमदार शंभूराज देसाई यांचे हस्ते त्यांचा भव्य नागरी सत्कार आयोजीत करण्यात आला होता त्याप्रसंगी ते बोलत होते.याप्रसंगी शिवसेना पदाधिकारी अशोक शेजवळ,सी.टी.पाटील,दिनकर शेजवळ,महादेव पाटील,एन.डी.पानस्कर,सुभाष महाडिक,राजाराम शेजवळ, लखन पाटील,विष्णू पाटील,विठ्ठल तिकुडवे, प्रकाश शेजवळ, बाबूराज शेजवळ या प्रमुख पदाधिकाऱ्यासंह सुळेवाडी,सोनवडे, हुंबरवाडी व शिंदेवाडी येथील ग्रामस्थ मोठया संख्येने उपस्थित होते.

              यावेळी बोलताना आमदार शंभूराज देसाई म्हणाले,पाटण या डोंगरी व दुर्गम तालुक्यातील सुळेवाडी गावाचा शशिकांत शेजवळ (फौजी) गरीब कुटुंबातील युवक लष्करात भरती होवून त्यांना नायब सुभेदार पदावर बढती मिळाली आहे ही बाब आपल्या सर्वांकरीता अभिमानास्पद आणि गौरवास्पद असून पाटण तालुक्याची मान अभिमानाने उंचावणारी आहे मी प्रथमत: त्यांना बढती मिळालेबद्दल त्यांचे मनपुर्वक अभिनंदन करतो. जवानांचं जीवन किती खडतर असतं व त्यांना सीमेवर अतिरेक्यांचा कसा सामना करावा लागतो हे मी प्रत्यक्ष जम्मु काश्मीरला गेल्यानंतर पाहिले आहे.आपल्या गांवाकडील,भागातील,तालुक्यातील आणि देशातील लोक सुरक्षित रहावे याकरीता हे फौजी आणि जवान सिमेवर जिवाची बाजी लावत वेळप्रसंगी लढा देत आपले सर्वांचे सरंक्षण करीत असतात.सिमेवर जवान प्रमाणिकपणे लढा देत आहेत म्हणूनच आपण याठिकाणी सुरक्षित आहोत हे आपण विसरुन चालणार नाही.त्यामुळे जवानांना मानसिक बळ देण्याकरीता त्यांच्याबद्दल आपल्या सर्वांच्या मनात आदर असला पाहिजे असे सांगत त्यांनी कारगिलच्या युध्दात शहीद झालेले आपल्या तालुक्यातील भूडकेवाडी गावचे शहीद जवान कै.गजानन मोरे यांच्या २७ ऑगस्टच्या स्मृतीदिनी मी प्रत्येक वर्षी नियमित खंड न पडता अभिवादन करण्यासाठी जात असतो. त्यांच्या वडीलांचे दु:खद निधन झाले असून त्यांच्या मातोश्री श्रीमती चतूराबाई यांना कोणतीही अडचण आल्यानंतर मी स्वत: धावून जातो मी या तालुक्याचा आमदार आहे या अविर्भावात मी कधी रहात नाही.कारण फौजी, जवान किंवा त्यांचे कुटुंब यांचेमुळे आपण सुरक्षित आहोत ही भावना मनी बाळगण्याची सर्वांनी गरज आहे. आपल्या सर्वांपेक्षा त्यांचा मानसन्मान मोठा आहे असे सांगत त्यांनी शशिकांत शेजवळ (फौजी) यांना नायब सुभेदार म्हणून बढती मिळाली असून ते सुभेदार म्हणून या सेवेत सवेानिवृत्त व्हावे व सुभेदार म्हणून त्यांचा सत्कार व सन्मान करण्याची संधी मला मिळावी अशाही शुभेच्छा त्यांनी यावेळी दिल्या.तसेच पाटण मतदारसंघात पुरग्रस्तांना, अतिवृष्टीबाधितांना मदत वाटण्याचे कामांची गडबड सुरु असताना मतदारसंघात दुसऱ्या कोणत्याही कार्यक्रमांना वेळ न देता पुरग्रस्तांना,अतिवृष्टीबाधितांना प्राधान्याने मदत कशाप्रकारे पोहचविता येईल याकडे प्राधान्याने लक्ष केंद्रीत केले असल्याचे सांगत शशिकांत शेजवळ (फौजी) यांना नायब सुभेदार पदावर बढती मिळालेबद्दल त्यांचा सत्काराचा एकमेव कार्यक्रम आपण स्विकारला असल्याचेही आमदार शंभूराज देसाईंनी यावेळी बोलताना सांगितले.

              यावेळी शशिकांत शेजवळ (फौजी) यांनीही आपले मनोगत व्यक्त करुन तरुणांनी चांगल्या संगतीमध्ये राहून आपले भविष्य घडवावे व आपले जीवन देशाच्या हिताच्या कामांकरीता मार्गी लागावे अशी अपेक्षा यावेळी व्यक्त केली याप्रसंगी चंद्रकांत पाटील यांनी उपस्थितांचे आभार मानले.

सुपने मंडलातील नुकसानग्रस्तांना सर्वांना मदत मिळेल याची काळजी घ्या. नुकसानीचे पंचनामे तात्काळ दया आमदार शंभूराज देसाईंच्या सर्व अधिकाऱ्यांना सुचना. आमदार शंभूराज देसाईंनी घेतली सुपने मंडलातील बैठक.

           दौलतनगर दि. १८:-पाटण विधानसभा मतदारसंघात मागील महिन्यातील दि.२६ जुलै पासून सातत्याने कोसळणाऱ्या मुसळधार पावसामुळे व कोयना धरणातून मोठया प्रमाणात सोडण्यात आलेल्या पाण्यामुळे कोयना नदीकाठी महापुराची परिस्थिती निर्माण झाली होती त्यामुळे अनेक गांवाचा संपर्कही तुटला होता.पाटण मतदारसंघातील सुपने मंडलातील म्होर्पे, तांबवे, साजूर व केसे या गांवामध्ये कोयना नदीचे पाणी घुसले होते.आता महापुर ओसरला आहे सगळे रस्ते,पुल वाहतूकीकरीता खुले झाले आहेत.अतिवृष्टीमुळे अनेक गांवामध्ये मातीची राहत्या घराच्या भिंती कोसळल्या आहेत,तर अनेक घरांमध्ये पुराचे पाणी घुसल्याने मोठे नुकसान झाले आहे. शेतीबरोबर शेतीपिकांचेही व सार्वजनीक मालमत्तेचेही मोठे नुकसान झाले असून नुकसान झालेल्या जनतेला लवकरात लवकर नुकसान भरपाई मिळवून देणेकरीता तातडीने पंचनाम्यांच्या कामांला लागा व सुपने मंडलातील एकही नुकसानग्रस्त मदतीपासून वंचीत राहता कामा नये याची काळजी घ्या अशा सक्त सुचना आमदार शंभूराज देसाईंनी कराड तालुका प्रशासनातील सर्व अधिकाऱ्यांना दिल्या.

              नुकत्याच झालेल्या महापुरपरिस्थिती व अतिवृष्टीमध्ये नुकसान झालेल्यां पाटण विधानसभा मतदारसंघातील सुपने मंडलातील सर्व गांवाची स्वतंत्र बैठक आमदार शंभूराज देसाईंच्या अध्यक्षतेखाली वेदांत मंगल कार्यालय तांबवे फाटा याठिकाणी कराड तालुक्यातील सर्व तालुका प्रशासनाच्या अधिकाऱ्यांची आयोजीत करण्यात आली होती याप्रसंगी त्यांनी वरीलप्रमाणे अधिकाऱ्यांना सुचना केल्या.या बैठकीस कराडचे उपविभागीय अधिकारी हिम्मत खराडे,तहसिलदार अमरदीप वाकडे,कराडचे गटविकास अधिकारी आबासाहेब पवार,कराड शहर पोलिस निरिक्षक धुमाळ,सार्वजनिक बांधकाम,जिल्हा परिषद बांधकाम,पाटबंधारे विभाग,कृषी,पाणी पुरवठा,सार्वजनीक आरोग्य, शिक्षण, वीज वितरण,विभागाचे सर्व शाखा अभियंता हे शासकीय अधिकारी तर जिल्हा परीषद सदस्य प्रदीप पाटील, पंचायत समिती सदस्य सविता संकपाळ,हणमंतराव चव्हाण,प्रभाकर शिंदे,शिवाजी गायकवाड, लक्ष्मण देसाई, अविनाश पाटील,म्होर्पे सरपंच तुकाराम डुबल,आनंदा कळके या प्रमुख पदाधिकारी यांची प्रमुख उपस्थित होती.

              यावेळी आमदार शंभूराज देसाईंनी सुपने मंडलातील म्होर्पे, तांबवे, साजूर व केसे या गांवामध्ये कोयना नदीचे पाणी घुसल्यामुळे झालेल्या नुकसानीची प्रथमत: माहिती घेतली. या गांवामध्ये किती लोकांना स्थलांतरीत करण्यात आले होते. त्या लोकांपर्यंत तातडीची मदत म्हणून ब्लँकेट तसेच धान्य वाटप करण्यात आले होते.मी स्वत: साजुर आणि तांबवे गांवातील पुरबाधित जनतेची भेट घेवून त्यांना तातडीची मदत दिली आहे.अतिवृष्टीमुळे या गांवामधील मातीची राहत्या घराच्या भिंती कोसळल्या आहेत तर कोयनेच्या पुराचे पाणी घुसल्याने मोठे नुकसान झाले आहे. नदीकाठच्या शेती पाण्यात गेल्यामुळे येथील तसेच इतर भागातील शेतीपिकांचेही व सार्वजनीक मालमत्तेचेही मोठे नुकसान झाले असून यामध्ये ग्रामीण रस्त्याचे तसेच नदीकाठच्या विहीरी पाण्याखाली गेल्याने पिण्याच्या पाण्याच्या योजनांचे, तर नदीकाठच्या उपसा जलसिंचन योजनांचेही मोठे नुकसान झाले आहे.शेतीपिकांचे सरसकट पंचनामे करण्याचे आदेश शासनाकडून देण्यात आले असून कृषी विभागाच्या अधिकाऱ्यांनी लवकरात लवकर पंचनाम्यांची प्रक्रिया पुर्ण करुन घ्यावी पाटण तालुक्यात अतिवृष्टी व महापुरामुळे नुकसान झालेल्यांचे पंचनामे करण्याचे काम युध्दपातळीवर सुरु असून याही विभागातील अधिकाऱ्यांनी पंचनाम्यांच्या कामांत हयगय करु नये. झालेल्या सर्व नुकसानीचे पंचनामे संबधित विभागाच्या अधिकाऱ्यांनी तात्काळ तयार करुन ते शासनास सादर करावेत त्याची एक प्रत माझेकडेही देण्यात यावी.लवकरात लवकर झालेल्या नुकसानीची नुकसानभरपाई तसेच सार्वजनीक मालमत्तेची पुर्नंबांधणी करणेकरीता आवश्यक असणारा निधी शासनाकडून मंजुर करुन आणण्यास आपणांस मदत होईल. झालेल्या नुकसानीची भरपाई देण्यास शासन तयार आहे त्यामुळे सुपने मंडलातील एकही नुकसानग्रस्त मदतीपासून वंचीत राहता कामा नये याची काळजी कराड तालुक्यातील अधिकाऱ्यांनी प्राधान्याने घ्या अशाही सुचना त्यांनी यावेळी दिल्या.

चौकट:- तांबवे पुलाचे काम लवकरात लवकर पुर्ण करा.

             तांबवे येथील पुलाचे काम रखडल्यामुळे या विभागातील जनतेला नाहक त्रास सहन करावा लागत असून या पुलाचे काम युध्दपातळीवर हाती घेवून येत्या चार दिवसात ते पुर्ण करुन घ्यावे अशा सक्त सुचना आमदार शंभूराज देसाईंनी सार्वजनीक बांधकाम विभागाचे अधीक्षक अभियंता राजभोज यांना दुरध्वनीवरुन दिल्या तसेच याठिकाणी उपस्थित असणाऱ्या सार्वजनीक बांधकाम विभागाच्या अधिकाऱ्यांनाही पुलाच्या कामात चालढकल करु नका दोन दिवसात दुचाकी वाहने तरी  या पुलांवरुन जाण्याचे नियोजन करा अशाही सुचना केल्या.

२५१५ योजनेमधून पाटण मतदारसंघातील ३२ गावांना ०५ कोटी रुपयांचा निधी मंजूर. आमदार शंभूराज देसाई.

­­

          दौलतनगर दि.15:- पाटण विधानसभा मतदारसंघातील विविध गावांतील अंतर्गत रस्ते,पोहोच रस्ते इत्यादी विविध विकास कामांकरीता सन २०१९-२० या आर्थिक वर्षामध्ये राज्य शासनाच्या ग्रामविकास व पंचायत राज विभागांतर्गत २५१५ योजनेमधून ०५ कोटी रुपयांचा निधी मंजूर झाला असल्याची माहिती आमदार शंभूराज देसाई यांनी प्रसिध्दीपत्रकाव्दारे दिली आहे.

          प्रसिध्दीस दिलेल्या पत्रकांत त्यांनी म्हंटले आहे,पाटण विधानसभा मतदारसंघातील ३२ गावांतील अंतर्गत रस्ते,पोहोच रस्ते इत्यादी विविध विकासकामांकरीता सन २०१९-२० या आर्थिक वर्षामध्ये राज्यशासनाच्या २५१५ योजनेमधून निधी मंजूर होणेकरीता दि.११.०७.२०१९ रोजीचे पत्रानुसार राज्याचे ग्रामविकास मंत्री ना.पंकजाताई मुंढे व राज्यमंत्री ना. दादाजी भुसे यांच्याकडे मागणी केलेली होती. त्यानुसार सन २०१९-२० या आर्थिक वर्षासाठी शासनाच्या ग्रामविकास व पंचायतराज विभाग यांचेकडील दि.०८ ऑगस्ट, २०१९ रोजी शासन निर्णयानुसार पाटण विधानसभा मतदारसंघातील एकूण ३२ विविध विकासकामांना ०५ कोटी  रुपयांचा निधी मंजूर करण्यात आला आहे. मंजूर झालेल्या विकासकामामध्ये मराठवाडी ते भारसाखळे रस्ता खडीकरण डांबरीकरण  २०.०० लाख,आडदेव पोहोच रस्ता खडीकरण डांबरीकरण २०.०० लाख,बावीचावाडा कोंढावळे पोहोच रस्ता खडीकरण डांबरीकरण  २०.०० लाख,कोचरेवाडी पोहोच रस्ता खडीकरण डांबरीकरण  २०.०० लाख,बांबवडे ते कळंबे पोहोच रस्ता खडीकरण डांबरीकरण २०.०० लाख,किल्ले मोरगिरी ते गुंजाळी पोहोच रस्ता खडीकरण डांबरीकरण  २०.०० लाख,तांबवे ते उत्तर तांबवे पोहोच रस्ता खडीकरण डांबरीकरण २०.०० लाख,आरेवाडी पोहोच रस्ता खडीकरण डांबरीकरण २०.०० लाख,रामेल ते शेळकेवस्ती पोहोच रस्ता खडीकरण डांबरीकरण १५.०० लाख,वन पोहोच रस्ता खडीकरण डांबरीकरण १५.०० लाख,ताटेवाडी ते सलतेवाडी पोहोच रस्ता खडीकरण डांबरीकरण  १५.०० लाख,शिंगमोडेवाडी बनपूरी पोहोच रस्ता खडीकरण डांबरीकरण १०.०० लाख,मठवाडी महिंद पोहोच रस्ता खडीकरण डांबरीकरण  १०.०० लाख,चेणगेवाडी सळवे पोहोच रस्ता खडीकरण डांबरीकरण  १०.०० लाख,देशपांडेवाडी किसरुळे पाहोच रस्ता खडीकरण डांबरीकरण  १०.०० लाख,शिबेवाडी कुंभारगावाडी कुंभारगाव पोहोच रस्ता खडीकरण डांबरीकरण १०.०० लाख,लोहारवाडा शिंबेवाडी कुंभरगाव पोहोच रस्ता खडीकरण डांबरीकरण  १०.०० लाख,दौलतनगर मरळी नविन वसाहत अंतर्गत रस्ता खडीकरण डांबरीकरण  ५५.०० लाख, कुशी पुनर्वसन वेखंडवाडी अंतर्गत रस्ता सुधारणा  २५.०० लाख,ढेबेवाडी चर्मकारवस्ती अंतर्गत रस्ता सुधारणा  २०.०० लाख,नेताजीनगर गोकूळ तर्फ हेळवाक अंतर्गत रस्ता खडीकरण डांबरीकरण  २०.०० लाख,माथणेवाडी चाफळ अंतर्गत रस्ता खडीकरण डांबरीकरण  १५.०० लाख,सुर्यवंशीवाडी अंतर्गत रस्ता खडीकरण डांबरीकरण  १०.०० लाख, मुळगाव मागासवर्गीयवस्ती अंतर्गत रस्ता खडीकरण डांबरीकरण १०.०० लाख,खराडवाडी नाणेगाव अंतर्गत रस्ता सुधारणा  १०.०० लाख,सदुवर्पेवाडी सळवे पोहोच रस्ता खडीकरण डांबरीकरण  १०.०० लाख,बोपोली अंबाखेळती मंदिर पोहोच रस्ता खडीकरण डांबरीकरण १०.०० लाख,जमदाडवाडी मळावस्ती रस्ता डांबरीकरण  १०.०० लाख, कोतावडेवाडी साखरी रस्ता खडीकरण डांबरीकरण  १०.०० लाख,सुपने अंतर्गत रस्ता सुधारणा  १०.०० लाख,पाडळी केसे अंतर्गत रस्ता सुधारणा  १०.०० लाख,मौजे साकुर्डी अंतर्गत रस्ता सुधारणा १०.०० लाख असे ३२ कामांसाठी एकूण ०५ कोटी रुपयांचा निधी मंजुर झाला असून यासंदर्भात सार्वजनिक बांधकाम विभागाच्या संबधित अधिकाऱ्यांची बैठक घेवून या कामांच्या तातडीने निविदा प्रसिध्द कराव्यात अशा सुचना दिल्या आहेत लवकरच या विविध विकासकामांना सुरुवात होणार असल्याचेही आमदार शंभूराज देसाईंनी शेवठी पत्रकात म्हंटले आहे.

कोयना भूकंप पुनर्वसन निधी समितीकडून पाटण मतदारसंघातील 53 गावांना 06 कोटी 10 लाख रुपयांचा निधी मंजूर. आमदार शंभूराज देसाई.

दौलतनगर दि.15:- पाटण विधानसभा मतदारसंघातील विविध गावांतील अंतर्गत रस्ते,पोहोच रस्ते,सभामंडप इत्यादी विविध विकास कामांकरीता सन २०१9-20 या आर्थिक वर्षामध्ये कोयना भूकंप पुनर्वसन निधी समिती न्यासाकडून 6 कोटी 09 लाख 89 हजार रुपयांचा निधी मंजूर झाला असल्याची माहिती आमदार शंभूराज देसाई यांनी प्रसिध्दी पत्रकाव्दारे दिली आहे.

          प्रसिध्दीस दिलेल्या पत्रकांत त्यांनी म्हंटले आहे,पाटण विधानसभा मतदारसंघातील 53 गावांतील अंतर्गत रस्ते,पोहोच रस्ते,सभामंडप इत्यादी विविध विकासकामांकरीता सन २०१9-20 या आर्थिक वर्षामध्ये कोयना भूकंप पुनर्वसन निधी समिती न्यासाकडे निधी मंजूर होणेकरीता दि.14.06.२०१9 व दि.28.06.2019 रोजीचे पत्रानुसार मागणी केलेली होती.त्यानुसार सन २०१9-20 या आर्थिक वर्षासाठी मुख्यमंत्री ना.देवेंद्र फडणवीस अध्यक्ष असणाऱ्या कोयना भूकंप पुनर्वसन निधी समिती न्यासाकडून पाटण विधानसभा मतदारसंघातील एकूण 53 विविध विकासकामांना 6 कोटी 09 लाख 89 रुपयांचा निधी मंजूर करण्यात आला असून या कामांना दि.०१ ऑगस्ट,२०१९ रोजीचे पत्रानुसार प्रशासकीय मंजुरी देण्यात आली आहे.मंजूर झालेल्या विकासकामामध्ये पागेवाडी कुठरे,ता.पाटण पोहोच रस्ता खडीकरण डांबरीकरण 10.00 लाख,बोंद्री,ता.पाटण पोहोच रस्ता खडीकरण डांबरीकरण 20.00 लाख,महिंद पोहोच रस्ता खडीकरण डांबरीकरण 10.00 लाख,जानुगडेवाडी ते यादवस्ती रस्ता खडीकरण डांबरीकरण 10.00 लाख,मसुगडेवाडी दाढोली  पोहोच रस्ता खडीकरण डांबरीकरण 09.99 लाख,मोरगावाडी कोंजवडे रस्ता खडीकरण डांबरीकरण 15.00 लाख,नाव  पोहोच रस्ता खडीकरण डांबरीकरण 10.00 लाख,कोचरेवाडी पोहोच रस्ता खडीकरण डांबरीकरण 15.00 लाख,गोरेवाडी (मुरुड) माळवस्ती रस्ता खडीकरण डांबरीकरण 10.00 लाख,कुसरुंड धारमाऊली मंदिर ते शिंदेवार्ड पाटीलवार्ड पोहोच रस्ता खडी.डांबरीकरण 10.00 लाख,शिंगमोडेवाडी (बनपूरी) रस्ता सुधारणा 10.00 लाख,ढाणकल  शंभू महादेव मंदिर रस्ता खडीकरण डांबरीकरण 14.99 लाख,त्रिपुडी बेघरवस्ती उर्वरित रस्ता खडीकरण डांबरीकरण  15.00 लाख,रुवले ते पाटीलवाडी रस्ता खडीकरण डांबरीकरण 10.00 लाख,कोतावडेवाडी साखरी रस्ता खडीकरण डांबरीकरण 10.00 लाख,भारसाखळे पोहोच रस्ता खडीकरण डांबरीकरण 30.00 लाख,तामकडे पोहोच रस्ता खडीकरण डांबरीकरण 10.00 लाख,शेजवळवाडी (साबळेवाडी) पोहोच रस्ता खडीकरण,डांबरीकरण 15.00 लाख,मणेरी चिंचेचे आवाड बौध्दवस्ती रस्ता खडीकरण डांबरीकरण 10.00 लाख,सुळेवाडी अंतर्गत रस्ता खडीकरण डांबरीकरण 10.00 लाख,आंबेघर तर्फ मरळी अंतर्गत रस्ता खडीकरण डांबरीकरण 10.00 लाख,पवारवाडी कुठरे अंतर्गत रस्ता खडीकरण डांबरीकरण 10.00 लाख,तळमावले धुमाळवाडी अंतर्गत रस्ता खडीकरण डांबरीकरण 7.00 लाख,दिवशी बुद्रुक अंतर्गत रस्ता सुधारणा 10.00 लाख,हुंबरवाडी अंतर्गत रस्ता सुधारणा 10.00 लाख,काढोली रामवाडी अंतर्गत रस्ता खडीकरण डांबरीकरण 10.00 लाख,दास्तान येथील अंतर्गत रस्ता खडीकरण डांबरीकरण  09.99 लाख,मंद्रुळकोळे मधलेआवाड अंतर्गत रस्ता खडीकरण डांबरीकरण 20.00 लाख,मौजे चोपडी  अंतर्गत रस्ता खडीकरण डांबरीकरण 10.00 लाख,रासाटी दलितवस्ती रस्ता खडीकरण डांबरीकरण 08.00 लाख,फडतरवाडी घोट अंतर्गत रस्ता सुधारणा  07.50 लाख,कै.सौ.वत्सलादेवी देसाई हायस्कूल मरळी येथे मुख्य शाळेचे नुतनीकरण  20.00 लाख,शिवाजीराव देसाई विद्यालय सोनवडे शाळेकरीता सभागृह  15.00 लाख,येळेवाडी काळगाव येथे पत्रा सभास्टेज 05.00 लाख,चव्हाणवाडी धामणी, येथे सामाजिक सभागृह  07.50 लाख,सळवे पाटील आवाड येथे सामाजिक सभागृह 07.50 लाख,दिक्षी येथे सामाजिक सभागृह 07.50 लाख,चोरगेवाडी कुंभारगाव येथे सामाजिक सभागृह  07.50 लाख,मोरेवाडी पेठशिवापूर  येथे सामाजिक सभागृह  7.50 लाख,चाफळ ते जंगलवाडी  रस्ता खडीकरण,डांबरीकरण  24.98 लाख,निनाईवाडी कसणी 01 किमी रस्ता खडीकरण  डांबरीकरण  15.00 लाख,अंबवडे खुर्द शिंदेवाडी ते चोरगेवाडी रस्ता खडीकरण डांबरीकरण 15.00 लाख,सावरघर पोहोच रस्ता खडीकरण डांबरीकरण  10.00 लाख,कारळे गावठाण नवाळवाडी,पाटीलवाडी व डागेची आळी रस्ता खडी. डंबरीकरण 10.00 लाख,तामिणे मानेवस्ती अंतर्गत रस्ता  काँक्रीटीकरण  07.50 लाख,तामिणे रासू आवाड अंतर्गत रस्ता  काँक्रीटीकरण 07.50 लाख,हेळवाक सुतारवस्ती ते मुस्लिमवस्ती पोहोच रस्ता खडीकरण,डांबरीकरण 10.00 लाख,गोकूळ तर्फ हेळवाक मुस्लिम मदरसा सभोवती संरक्षक‍ भिंत 10.00 लाख,येराडवाडी अंतर्गत रस्ता खडीकरण डांबरीकरण 9.99 लाख,लोहारवस्ती केरळ पोहोच रस्ता खडीकरण डांबरीकरण 10.00 लाख,निवडे पुनर्वसन पोहोच रस्ता खडीकरण डांबरीकरण 10.00 लाख,चौगुलेवाडी मुठ्ठलवाडी कात्रेवस्ती रस्ता खडीकरण डांबरीकरण 10.00 लाख,रामापूर  येथे मुस्लिम समाजाकरीता सार्वजनिक सभागृह 15.00 लाख असे 53 कामांसाठी एकूण 6 कोटी 09 लाख 89 हजार रुपयांचा निधी मंजुर झाला असून यासंदर्भात सार्वजनिक बांधकाम विभागाच्या संबधित अधिकाऱ्यांची बैठक घेवून या कामांच्या तातडीने निविदा प्रसिध्द कराव्यात अशा सुचना दिल्या आहेत लवकरच या विविध विकासकामांना सुरुवात होणार असल्याचेही आमदार शंभूराज देसाईंनी शेवठी पत्रकात म्हंटले आहे.

पाटणकर महाशय,मा.ना.विजय शिवतारेबापूंनी पाटणला येवून किती धोरणात्मक निर्णय घेतले याची शासकीय माहिती घ्या. आमदार शंभूराज देसाईंचा सत्यजितसिंह पाटणकरांना सल्ला.

­­

          दौलतनगर दि.14:- सातारा जिल्हयाचे पालकमंत्री मा.ना.विजय शिवतारेबापू सातारा जिल्हयात कधी येतात आणि कधी नाही हे पहायला सत्यजितसिंह पाटणकर तुम्ही जिल्हयात असायला हवे ना? तुम्हाला तुमचा चिरेबंदी वाडा सुटत नाही ते जिल्हयाला तुम्ही कधी जाणार.जिल्हयाचे पालकमंत्री मा.ना.विजय शिवतारेबापू पाटणला पर्यटनाला आले होते का? पाण्यात असलेल्या पाटणमधील जनतेला दिलासा देण्याकरीता हे पाटणमधील जनतेने आणि तुम्हीही पाहिले आहे. पाटण पाण्यात असताना वाडयात बसून पत्रके काढणाऱ्या सत्यजितसिंह पाटणकरांनी जिल्हयाचे पालकमंत्री मा.ना. विजय शिवतारेबापू यांनी जिल्हयातील सर्व शासकीय अधिकाऱ्यांना बरोबर घेवून पाटणला येवून पुरपरिस्थितीत नुकसान झालेल्यांना कशाप्रकारे मदत देता येईल यासंबधीने किती धोरणात्मक निर्णय घेतले याची शासकीय माहिती जरा घ्या.असा सल्ला आमदार शंभूराज देसाईंनी सत्यजितसिंह पाटणकरांना प्रसिध्दीमाध्यमांशी बोलताना दिला.                       

           प्रसिध्दीमाध्यमांशी बोलताना आमदार शंभूराज देसाई म्हणाले,सातारा जिल्हयाचे पालकमंत्री मा.ना.विजय शिवतारेबापू पाटण तालुक्यात किती वेळा आले हे पाटण तालुक्यातील जनतेला चांगलेच माहिती आहे त्याकरीता आपल्या दाखल्याची गरज ना आम्हाला आहे ना तालुक्यातील जनतेला आहे.जिल्हयाचे पालकमंत्री मा.ना.विजय शिवतारेबापू यांचे आणि माझे कधीही मतभेद नव्हते आणि नाहीत. आमच्या दोघांमध्ये जिल्हयामध्ये चांगले चालले असताना केवळ दोघांत गैरसमज  पसरवून चांगल्या चाललेल्या विकासकामांत कसा खोडा घालायचा याशिवाय तुम्हाला आणि तुमच्या पक्षाच्या नेत्यांना दुसरे काही येतच नाही याचाही अनुभव पाटण तालुक्याने नव्हे तर संपुर्ण सातारा जिल्हयाने घेतला आहे. आमच्या दोघांच्या संदर्भात विपर्यास करणाऱ्या बातम्या मागील काळात प्रसिध्द झाल्या होत्या. त्याची काळजी सत्यजितसिंह पाटणकरांनी करु नये.आमच्या दोघांत मतभेद आणि मी त्यांची मापे काढली असती तर ते पाटण तालुक्यात आलेच नसते आणि जिल्हा नियोजन समितीच्या माध्यमातून त्यांनी पाटण तालुक्याला आवश्यक असणारा निधी दिलाच नसता हे न समजण्याइतपत आपण अजुनही इतके बालीश आहात याचे नवल करावे एवढे थोडेच आहे.

               पाटण तालुक्यातला पुर ओसरल्यानंतर जिल्हयाचे पालकमंत्री मा.ना.विजय शिवतारेबापू आले असल्याची बालीश टिका करणारे सत्यजितसिंह पाटणकर गेल्या आठ दिवसाच्या पुराच्या काळात जिल्हयाचे पालकमंत्री मा.ना.विजय शिवतारेबापू दिवसातून दोन ते तीन वेळा माझे संपर्कात होते.सातत्याने त्यांच्याकडून या पुरासंदर्भात विचारणा होत होती.तेव्हा तुम्ही परदेश दौऱ्यात मग्न होतात. तुम्हाला कसे कळणार पालकमंत्र्यांना आपल्या तालुक्याची किती काळजी आहे ते? आमचा पक्ष, आमचे नेते यांची टिमकी वाजविणारे पाटणकर तुमच्या पक्षाचा एकही नेता पाटण तालुक्यात फिरकला नाही. तुमचे नेते मतदारसंघातील तांबव्यात आले तेव्हा त्यांना पाटण लांब नव्हते आपलं ठेवायचं झाकून अन् दुसऱ्याचं बघायचं वाकून हे उद्योग बंद करा. पाटण शहरातीलच लोकांना आपण अमावस्या, पौर्णिमेला दिसत आहात आणि मापे पालकमंत्र्यांची कसली काढताय?  पालकमंत्री मा.ना.विजय शिवतारे बापू पाटणचा पुर ओसरल्यानंतर आले असले तरी खरी गरज ही पुर ओसरल्यानंतरच होती कारण पुरात नुकसान झालेल्यांना पुरात असताना बाहेर काढायला तालुक्याचा आमदार म्हणून मी सक्षम आहे. पालकमंत्री मा.ना.विजय शिवतारेबापू येतानाच जिल्हास्तरीय सर्व अधिकारी बरोबर आणून त्यांनी पाटण शहरातील पहाणी केली आणि तालुक्यातील नुकसानीचा आढावा घेतला नुसता आढावा घेतला नाही तर पाटण तालुक्यातील बाधित सर्वांना कशाप्रकारे मदत करता येईल यासंदर्भात त्यांनी अनेक निर्णयही घेतले आणि आवश्यक निधी कसा उपलब्ध करायचा याचेही त्यांनी नियोजन केले.तुम्ही काय केले हे जरा तालुक्यातील जनतेला सांगता का? असा सवालही त्यांनी शेवठी बोलताना केला.

सत्यजितसिंहाची फॅक्टरी २० वर्षापासून पाटण तालुक्यात येतच आहे. परदेशवारी मौजमजेसाठी,नवीन प्रकल्पाचा केवळ दिखावा. आमदार शंभूराज देसाईंचा सत्यजितसिंहाना प्रतिटोला.

           दौलतनगर दि.१४:- साखर कारखान्याच्या मशनरी देशाच्या कुठल्याही कानाकोपऱ्यात मिळतात त्यासाठी परदेशात जाण्याची काहीच गरज नाही सत्यजितसिंह पाटणकर असा कोणता जगावेगळा कारखाना पाटण तालुक्यात उभा करीत आहेत ज्यासाठी त्यांना परदेशात जाण्याची गरज पडली.नवीन प्रकल्पासाठी परदेशात गेलो होतो अशा केवळ त्यांच्या बतावण्या आहेत.तालुका पाण्यात असताना हे परदेशवारीत मौजमजा करीत होते हेच त्रिवार सत्य असून सत्यजितसिंहाची ती फॅक्टरी गेल्या २० वर्षापासून पाटण तालुक्यात येतच असून नवीन प्रकल्पासाठी परदेशात गेलो होतो हा केवळ दिखावा आहे.सदैव भावीच आमदार राहणारे सत्यजितसिंह पाटणकर हे पाटण तालुका पुरात असताना परदेशात मौजमजा करीत आहे हे जनतेसमोर आल्याने स्वत:चेच पाप लपविण्यासाठी ते मला व पालकमंत्र्यांना नको तो शहाणपणा शिकवत असल्याचा प्रतिटोला आमदार शंभूराज देसाईंनी सत्यजितसिंह पाटणकरांना लगाविला आहे.

             आमदार शंभूराज देसाई म्हणाले,पाटण मतदारसंघाचा भावी आमदार म्हणून घेणाऱ्या सत्यजितसिंहांच्या उलटया बोंबा पाटण मतदारसंघातील जनता अनुभवत आहे.सत्यजितसिंह पाटणकर सदैव भावीच आमदार राहणार आहेत हे पाटण मतदारसंघातील जनतेनेही त्यांच्या कर्तत्वावरुन ओळखले आहे.पाटण मतदारसंघात अनपेक्षित पाऊस कोसळला आणि अनपेक्षित महापुर आला असे सांगणारे पाटणकर यांना पाटण मतदारसंघातील जनतेची किती काळजी आहे. हे मतदारसंघातील जनतेच्या चांगलेच लक्षात आले आहे.जगाच्या पाठीवर कुठेही असलो तरी १८ तासापेक्षा जादा वेळ मुंबईत यायला लागत नाही हे महाशय तर सलग १० दिवस गायब होते.परदेशात माणसे प्रकल्पाचा अभ्यास करायला जात नाहीत तर मौजमजाच करायला जातात हे बारक्या पोरालाही कळते आणि सत्यजितसिंह पाटणकर नवीन प्रकल्प आणायला परेदशात गेलो होतो असे सांगत बसले आहेत.आपली निष्क्रीयता झाकण्यासाठी नेहमीच पाटणकर पितापुत्रांनी अशा अनेक बतावण्या केल्या आहेत.सत्यजितसिंह पाटणकर बघितले तर साखरेचा कारखाना उभा करीत आहेत.त्यामध्ये साखर निघणार का गुळ पावडर हे अजून त्यांनी मतदारसंघातील जनतेला सांगितले नाही आणि म्हणतात तालुक्याला नवीन प्रकल्पाची भेट देणार.अहो बच्चूदादा गेली ३३ वर्षे मी पाटण तालुक्यात साखर कारखान्याचे काम पहात आहे. साखर कारखाना चालविताना मला कुठे परेदशात अभ्यासाला जायची वेळ आली नाही.जे काही शिकलो ते याच कारखान्यात आणि आपल्याच देशातच शिकलो.तुमचे अज्ञान इथेही कशाला प्रगट करताय असा बोचरा टोला लगावून ते म्हणाले,आमचे पाप काढण्यापेक्षा आपण कारखान्याच्या अभ्यासाकरीता परदेशात गेला होता का आणखीन कशासाठी? हे लवकरच तालुक्यातील जनतेच्या समोर येईल.

          मला रोड शो करण्याची गरज भासत नाही उलट तुम्हालाच आता रोड शो करण्याची गरज पडली आहे म्हणूनच परदेशातून आल्यानंतर मी किती सक्रीय आहे हे दाखविण्याकरीता तुम्ही आता गावोगावी जाण्याचे नाटक करीत आहात. पण तुम्ही तिथे जावून करताय काय? तुमच्या हातात आहेच काय? मी अगोदरच जिथे जिथे अतिवृष्टी व महापुरामुळे नुकसान झाले आहे तिथे तिथे शासनाच्या मदतीच्या व्यतिरिक्त स्वत: सगळे प्रयत्न करुन आवश्यक ती मदत पोहचविण्याचे काम केले आहे.म्हणूनच पाटण मतदारसंघातील सुमारे ५१९५ बाधित कुटुंबापर्यंत पोहचून या कुटुंबातील सुमारे १९,३६२ बाधित व्यक्तीपर्यंत मदत पोहचली आहे.आणि अजुनही जादाची मदत मिळवून ती बाधित कुटुंबापर्यंत पोहचविण्याकरीता मी आमदार म्हणून कटीबध्द आहे.ते तुमच्यासारख्यांचे काम नाही हेही तालुक्यातील जनता जाणते.तोंड बघून मदत दिली असती तर इतक्या बाधित जनतेपर्यंत ही मदत पोहचली नसती त्यामुळे बालिशपणा सोडून तुम्ही किती मदत जनतेपर्यंत पोहचवली याची माहिती जनतेसमोर जाहीर केले तर बरे होईल. मी ज्या जेसीबी मधून पाटणमध्ये आलो तो त्त्या चार ठिकाणी किती पाणी होते याची माहिती अगोदर करुन घ्या. जेसीबीमधील माझा व्हिडीओ कार्यकर्त्यांनी काठावर उभा राहून घेतला आहे. तो व्हिडीओ मी घेतला असता म्हणजे तुमच्या लक्षात आले असते पाटणचे आमदार किती पाण्यातून प्रवास करीत होते ते.

चौकट:- पालकमंत्र्यांना, आमदारांना काय अधिकार असतात हे पिताश्रींना खाजगीत विचारा.

              सत्यजितसिंह पाटणकर,पालकमंत्र्यांना,आमदारांना काय अधिकार असतात हे तुम्हाला शासनाची आयुधे अजुन माहिती नसल्याने कळणार नाही.पालकमंत्र्याचे आणि आमदारांचे अधिकार काय असतात हे स्वत:च्या जिल्हयाचे न होवू शकलेल्या परंतू बीड जिल्हयाचे पालकमंत्री राहिलेल्या आपल्या पिताश्रींना खाजगीत विचारा.म्हणजे तुम्हाला कळेल. पालकमंत्र्यांच्या आणि माझ्यातील आरोपांची तुम्ही काळजी करु नका आमच्यात कोणतेही भांडण अथवा दुरावा नव्हता गेल्या पाच वर्षात आम्ही एकत्रितपणेच काम केले आहे ते तुमच्या लक्षात यायला अजुन खुप वेळ असल्याचा टोलाही आमदार शंभूराज देसाईंनी सत्यजितसिंहाना लगाविला आहे.